Bobby deol: నాగార్జునతో బాబీ దేవోల్‌ ఢీ!

‘కుబేర’ తర్వాత నాగార్జున చేయనున్న చిత్రంపై ఇప్పటికే స్పష్టత వచ్చింది. ఆయన స్టూడియో గ్రీన్‌ పతాకంపై తమిళ దర్శకుడు నవీన్‌తో ఓ సినిమా చేయనున్నారు. భారీ యాక్షన్‌ థ్రిల్లర్‌గా ముస్తాబు కానున్న ఈ చిత్రంలో బాలీవుడ్‌ నటుడు బాబీ దేవోల్‌ ఓ ప్రధాన పాత్ర పోషించనున్నారని సమాచారం. ఆయన నాగ్‌ను ఢీ కొట్టే ప్రతినాయకుడిగా శక్తిమంతమైన పాత్రలో కనిపించనున్నారని తెలిసింది. ప్రస్తుతం పూర్వ నిర్మాణ పనులు శరవేగంగా జరుగుతున్నాయని.. సినిమా జూన్‌ నెలాఖరు నుంచి చిత్రీకరణనువ ప్రారంభించుకోనుందని చిత్ర సన్నిహిత వర్గాలు తెలిపాయి. ఈ చిత్రంలో నాగ్‌కు జోడీగా ఇద్దరు కథానాయికలు కనిపించనున్నారు. మరి ఆ అవకాశం ఎవరికి దక్కుతుందో తేలాల్సి ఉంది.

పిడుగు సిద్ధమైంది

నాగార్జున, ధనుష్‌ ప్రధాన పాత్రల్లో శేఖర్‌ కమ్ముల తెరకెక్కిస్తున్న చిత్రం ‘కుబేర’. సునీల్‌ నారంగ్‌, పుస్కూర్‌ రామ్‌ మోహన్‌రావు సంయుక్తంగా నిర్మిస్తున్నారు. రష్మిక కథానాయిక. చిత్రీకరణ దశలో ఉన్న ఈ సినిమా నుంచి ఈ నెల 2న ఓ ప్రచార చిత్రం విడుదల కానుంది. ఈ విషయాన్ని చిత్ర బృందం సోమవారం ప్రకటించింది. ‘‘ఓ భారీ పిడుగును సీజ్‌ చేసి లోడ్‌ చేయడం జరిగింద’’ని చిత్ర నిర్మాణ సంస్థ సామాజిక మాధ్యమాల్లో రాసుకొచ్చింది. దీన్ని బట్టి ఈ సినిమా నుంచి ఓ వీడియో గ్లింప్స్‌ బయటకు రానున్నట్లు అర్థమవుతోంది.