F3: వెంకీ-వరుణ్‌లతో ప్రగ్యా స్పెషల్‌ సాంగ్‌

హైదరాబాద్‌: తెలుగు సినీ ప్రేక్షకులు ఎంతో ఆసక్తిగా ఎదురు చూస్తున్న చిత్రాల్లో ‘ఎఫ్‌3’ ఒకటి. అనిల్‌ రావిపూడి దర్శకత్వంలో వెంకటేశ్‌, వరుణ్‌తేజ్‌ కీలక పాత్రల్లో నటిస్తున్నారు. తమన్నా, మెహరీన్‌ కథానాయికలు. గతంలో వచ్చిన ‘ఎఫ్‌2’కు కొనసాగింపుగా ఈ సినిమా రాబోతోంది. శరవేగంగా చిత్రీకరణ జరుపుకొంటున్న ఈ సినిమా షూటింగ్‌ కరోనా కారణంగా ఆగిపోయింది. త్వరలోనే చిత్రీకరణకు సిద్ధమవుతోంది.

ఈ నేపథ్యంలో ఓ ఆసక్తికర వార్త తెలుగు చిత్ర పరిశ్రమలో చక్కర్లు కొడుతోంది. ఇందులో ప్రత్యేక గీతం కోసం కథానాయిక ప్రగ్యా జైశ్వాల్‌ను చిత్ర బృందం సంప్రదించిందట. మాస్‌, యూత్‌తో పాటు అన్ని వర్గాలను ఈ పాట ఆకట్టుకునేలా ఈ గీతం ఉంటుందని సమాచారం. దీంతో ఈ పాటకు కాస్త పేరున్న కథానాయిక అయితే బాగుంటుందని చిత్ర బృందం భావించిందట. అందుకే ప్రగ్యాను అడిగారట. ఆమెకు కూడా అందుకు సుముఖంగా ఉన్నట్లు తెలుస్తోంది. అయితే, దీనిపై చిత్ర బృందం స్పందించాల్సి ఉంది. శ్రీ వెంకటేశ్వరక్రియేషన్స్‌ పతాకంపై దిల్‌రాజు ఈ సినిమాను నిర్మిస్తున్నారు. దేవిశ్రీ ప్రసాద్‌ స్వరాలు సమకూరుస్తున్నారు.