Sudheer Babu: మహేశ్‌బాబుతో మల్టీస్టారర్‌.. సుధీర్‌ బాబు ఏమన్నారంటే

ఇంటర్నెట్‌ డెస్క్: ‘హరోం హర’ అంటూ ప్రేక్షకులను అలరించేందుకు సిద్ధమయ్యారు హీరో సుధీర్ బాబు (Sudheer Babu). మాళవిక శర్మ కథానాయిక. జ్ఞానసాగర్‌ ద్వారక దర్శకత్వంలో తెరకెక్కిన ఈ చిత్రం జూన్‌ 14న ప్రేక్షకుల ముందుకురానుంది. తాజాగా దీని ట్రైలర్‌ లాంచ్‌ ఈవెంట్‌ను నిర్వహించారు. ఈసందర్భంగా టీమ్ మీడియాతో ముచ్చటించింది. 

‘హరోం హర’ కథ గురించి చెప్పండి?

సుధీర్ బాబు: నేనెప్పుడూ యాక్షన్ సినిమా చేయాలనుకునేవాడిని. ‘హరోం హర’తో  (Harom Hara) అలాంటి కథ దొరికింది. మంచి విజయం సాధిస్తుందని నమ్మకం కలిగింది. చాలా రిస్క్‌ తీసుకొని చేసిన సినిమా ఇది. కృష్ణగారే నాతో ఈ చిత్రం చేయించారేమో అనిపించింది. అవుట్‌పుట్‌ అద్భుతంగా ఉంది. ట్రెండింగ్‌లో ఉన్న కథ ఇది. ఇలాంటి బ్యాక్‌డ్రాప్‌తో ఇప్పటివరకు ఇండియాలో ఏ సినిమా తెరకెక్కలేదు.

ఈ చిత్రంలో ఆడియన్స్‌కు ఆసక్తి కలిగించే పాయింట్‌ ఏంటి?

జ్ఞానసాగర్‌ ద్వారక: ‘హరోం హర’ చూశాక మంచి సినిమా చూశామనే భావన కలుగుతుంది. ఇప్పటివరకు చూసిన వారందరికీ నచ్చింది. జూన్‌ 14న ఆడియన్స్‌ నుంచీ ఇదే మాట వింటాం. నిర్మాతలు ఏ విషయంలోనూ రాజీ పడలేదు.

విమర్శలను ఎలా ఎదుర్కొంటారు?

సుధీర్ బాబు: నా సినిమాలు బాగా లేవని ఎవరైనా అంటే వాళ్లు నా నుంచి ఇంకా మంచి చిత్రాలు ఆశిస్తున్నారేమో అనిపిస్తుంది. ఏ విమర్శనైనా పాజిటివ్‌గానే తీసుకుంటా.

మే 31 నుంచి జూన్‌ 14కి వాయిదా వేయడానికి గల కారణమేంటి?

సుధీర్ బాబు: మంచి సినిమాను అందించాలనే వాయిదా వేశాం. మొదట మే 31న రిలీజ్‌ చేద్దామనుకున్నాం. కానీ, జూన్‌ 4న ఎన్నికల ఫలితాలు వస్తాయి. ఆ హడావిడి అంతా అయ్యాక విడుదలైతే బాగుంటుందని జూన్‌ 14కు మార్చాం. 

ఈ కథను ఎంచుకోవడానికి కారణమేంటి?

మాళవిక: ఈ పాత్ర నాకు సవాలుగా అనిపించింది. ఉత్తరాది నుంచి వచ్చి కుప్పం భాషలో తెరకెక్కుతోన్న సినిమాలో నటించాను. టీమ్‌ ఎంతో సపోర్ట్‌ చేసింది.

ప్రీ రిలీజ్‌కు మహేశ్‌బాబు వస్తారా?

సుధీర్ బాబు: చెప్పలేను. ఇంకా ఆయన్ని సంప్రదించలేదు.

కథను ఎంపిక చేయడంలో ఎలాంటి జాగ్రత్తలు తీసుకుంటారు?

సుధీర్ బాబు: ఏ కథనైనా ఆడియన్స్‌ పాయింట్‌లో వింటాను. నా కెరీర్‌కు సరిపోతుందా? అని ఆలోచిస్తాను. కృష్ణగారి జయంతిరోజు ఈ సినిమా ట్రైలర్‌ రిలీజ్‌ కావడం ఆనందంగా ఉంది. నేను యాక్షన్‌ సినిమా చేయాలని ఆయన కోరుకున్నారు.

ఆడి పేరు సుబ్రహ్మణ్యం.. కేరాఫ్‌ కుప్పం.. ఆసక్తిగా ‘హరోం హర ’ ట్రైలర్‌

మహేశ్‌బాబుతో (Mahesh Babu) మల్టీస్టారర్‌ తీసే అవకాశం ఉందా?

సుధీర్ బాబు: నాకూ చేయాలని ఉంది. మా ఇద్దరికీ సరిపోయే కథ ఉంటే కచ్చితంగా కలిసి నటిస్తాం.

పాన్‌ ఇండియాలో రిలీజ్‌ చేసే ఆలోచనలు ఉన్నాయా?

సుధీర్ బాబు: అలా విడుదల చేయాలంటే మొదటినుంచే కథను దానికి అనుగుణంగా తెరకెక్కించాలి. విడుదలయ్యాక ఫలితాన్ని బట్టి ఈ విషయం గురించి ఆలోచిస్తాం. 

మీ అబ్బాయి మహేశ్‌లా ఉంటాడు కదా.. వాళ్లిద్దరూ సినిమా తీసే అవకాశం ఉందా?

సుధీర్ బాబు: మొదట మా అబ్బాయిని సినిమాల్లోకి రానివ్వండి.

పుల్లెల గోపీచంద్‌ బయోపిక్‌లో మీరు నటిస్తున్నట్లు వార్తలు వస్తున్నాయి. నిజమేనా?

సుధీర్ బాబు: అవును. ఆ బయోపిక్‌లో నటిస్తున్నాను. సైన్‌ చేశాను. ఇంకా దానికి సంబంధించిన పనులు మొదలుపెట్టలేదు.

కృష్ణ, మహేశ్‌ సినిమాల్లో రీమేక్‌ చేసే అవకాశం వస్తే ఏది చేస్తారు?

సుధీర్ బాబు: అల్లురి సీతారామరాజు చేస్తాను.