Kidnap in US: అమెరికాలో భారత సంతతి కుటుంబం కిడ్నాప్‌

కాలిఫోర్నియా: అమెరికాలోని కాలిఫోర్నియాలో ఓ భారత సంతతి కుటుంబం అపహరణకు గురికావడం కలకలం రేపుతోంది. కాలిఫోర్నియాలోని మెర్స్‌డ్‌ కౌంటీలో ఈ ఘటన చోటుచేసుకుంది. అపహరణకు గురైన వారిలో ఎనిమిదేళ్ల బాలికతోపాటు ఆమె తల్లిదండ్రులు ఉన్నారు. అయితే, దుండగులు ప్రమాదకర ఆయుధాలు కలిగి ఉన్నట్లు పేర్కొన్న పోలీసులు.. అనుమానాస్పద వ్యక్తులను ఎవరూ నేరుగా సంప్రదించవద్దని హెచ్చరించారు.

భారత సంతతికి చెందిన జస్దీప్‌ సింగ్‌ (36), జస్లీన్‌ కౌర్‌ (27) దంపతులు తమ ఎనిమిదేళ్ల చిన్నారితో కలిసి సెంట్రల్‌ వ్యాలీలో నివాసముంటున్నారు. వీరితోపాటు చిన్నారి మామ అమన్‌దీప్‌ సింగ్‌ (39)లు అక్టోబర్‌ 3న అపహరణకు గురైనట్లు స్థానిక పోలీసులు వెల్లడించారు. సౌత్‌హైవే 59లోని 800 బ్లాక్‌ వద్ద వీరిని కొందరు దుండగులు ఎత్తుకెళ్లినట్లు గుర్తించామన్నారు. దీనిపై దర్యాప్తు చేస్తున్నామన్న పోలీసులు.. అపహరణకు గల కారణాలు ఇంకా తెలియాల్సి ఉందన్నారు.

దుండగులు ఆధారాలన్నింటినీ నాశనం చేశారని.. ఇప్పటివరకు  ఎటువంటి డిమాండ్లు రాలేదని మెర్స్‌డ్‌ కౌంటీ పోలీసులు వెల్లడించారు. వారి దగ్గర ప్రమాదకర ఆయుధాలు ఉన్నాయని.. అనుమానాస్పద వ్యక్తులు, బాధితులను నేరుగా సంప్రదించవద్దని సూచించారు. ఏదైనా సమాచారం ఉంటే వెంటనే తమకు తెలియజేయాలని కోరారు.