అనాథ చిన్నారులకు ప్రవాసాంధ్రుల సహకారంతో చేయూత

కళ్యాణదుర్గం: అనంతపురం జిల్లా శెట్టూరు మండలంలోని బసంపల్లి గ్రామానికి చెందిన పాలబండ్ల మధుసూదన్‌, పద్మక్కలు ఇటీవల అనారోగ్యంతో మృతి చెందారు. దీంతో వారి ఇద్దరు కుమార్తెలు అనాథలుగా మారారు. ప్రస్తుతం వారి పెదనాన్న శ్యామ్‌సుందర్‌ సంరక్షణలో ఉన్నారు. విషయం తెలుసుకున్న పురుషోత్తం ప్రవాసాంధ్రుల సహకారంతో చిన్నారులు పాటిబండ్ల అశ్విని, లక్ష్మిలకు ఒక్కొక్కరికి రూ.3 లక్షల చొప్పున ఆర్థిక సాయం చేశారు. రూ.10వేల విలువైన దుస్తులు అందజేశారు. భవిష్యత్‌లో కూడా వారికి అండగా ఉంటామని పేర్కొన్నారు. ఆర్థిక సాయం అందజేసిన వారిలో జ్ఞానభారతి విద్యాసంస్థల అధినేత రమేశ్‌బాబు, కొండయ్య, అచ్చంపల్లి రమేశ్‌, కొల్లి వెంకటేశ్‌ చౌదరి, వెంకట్‌(అమెరికా), కమ్మసంఘం నాయకులు ఉన్నారు.