శివపదం గీతాలకు బాలిలో అద్భుత నృత్య ప్రదర్శన

బాలి: శివపదం గ్లోబల్‌ ఫ్యామిలీ ఇండోనేషియాలోని బాలిలో భారతీయ శాస్త్రీయ నృత్యాలను ప్రదర్శించింది. తద్వారా ఏకత్వ సందేశాన్ని, కళలకు సరిహద్దులు లేవని చాటి చెప్పింది.  అమెరికాలో పుట్టి పెరిగిన 45 మంది యువ నర్తకీ నర్తకులు, నృత్య విద్యార్థులు, గురువులు కూచిపూడి, భరతనాట్యం, కథక్‌, ఒడిస్సీ నృత్యరూపకాలను ప్రదర్శించి ఆకట్టుకున్నారు.  బ్రహ్మశ్రీ డా. సామవేదం షణ్ముఖ శర్మ రచించిన శివపదం సాహిత్య పద్యాలతో పాటు త్యాగరాజు, అన్నమయ్య, మైసూర్ వాసుదేవాచార్యులు రచించిన సాహిత్యాలకు నృత్య ప్రదర్శనలు ఇచ్చి అలరించారు. అలాగే శివాష్టకం, దుర్గా దేవి స్తోత్రం వంటి వేద స్తోత్రాలను అనేక నృత్య కళారూపాలను ప్రదర్శించారు.  శ్రీ శ్రీ శ్రీ చంద్రశేఖర సరస్వతి స్వామి వారు ప్రపంచానికి శాంతి, శ్రేయస్సు తీసుకొచ్చేందుకు రచించిన మైత్రీమ్‌ భజత అనే గీతాన్ని అందమైన నృత్యరూపంతో ప్రదర్శించారు. 

ఈ కార్యక్రమానికి ముఖ్యఅతిథులుగా నవీన్ మేఘ్వాల్ (బాలిలోని ఐసీసీఆర్‌-ఎస్‌వీసీసీ డైరెక్టర్‌), రెక్టర్: ప్రొఫెసర్ డా. ఐ వాయన్ అద్న్యానా ఇసి, డెన్‌పాసర్, గౌరవ అతిథులుగా  వైస్ రెక్టార్: డా. ఏ. ఏ. గేడే రాయ్ రేమావా వైస్ రెక్టార్: డా. ఐ కేటుట్ ముకా, వైస్ రెక్టార్: ప్రొఫెసర్ డా. నేను కొమంగ్ సుదీర్గ తదితరులు పాల్గొన్నారు. ఈ కార్యక్రమంలో కళలకు హద్దులు లేవు, కళలు అందరినీ కలుపుతాయి అని అమెరికా నుంచి వచ్చిన కళాకారుల్ని అభినందించారు.  ఉబుద్‌లోని సరస్వతి ఆలయంలో, డెన్‌పసర్‌లోని ఇండోనేషియా ఇన్‌స్టిట్యూట్ ఆఫ్ ఆర్ట్స్‌లో అద్భుతమైన ప్రదర్శనలు ఇచ్చినట్లు నిర్వాహకులు తెలిపారు.  అమెరికా నుంచి వచ్చిన యువ నర్తకీ నర్తకులు 'మేం ఇంత అద్భుతమైన సమయాన్ని గడిపడమే కాక, ఇప్పుడు మన మూలాలను కూడా తెలుసుకుంటున్నాం” అని చిరునవ్వుతో చెప్పడంతో ఋషిపీఠం (ఇండియా),  నో యువర్ రూట్స్ (యూ.ఎస్.ఏ)తో కలిసి తాము అనుకున్న లక్ష్యం నెరవేరిందని చెప్పడానికి సంతోషిస్తున్నామన్నారు.  అందరికీ శివపదం కానుకగా అందించిన  గురువులు దీపాన్విత, హేమమాలిని, అఖిల, బిదిషా, కళ్యాణి, సంగీత, స్వప్న, సిమాలకు ధన్యవాదాలు తెలిపారు. అలాగే  శివపదం గీతాలను ప్రసాదించినందుకు బ్రహ్మశ్రీ డా. సామవేదం షణ్ముఖ శర్మకి కృతజ్ఞతలు తెలిపారు.