ఛార్లెట్‌లో ఘనంగా ఎన్టీఆర్‌ జయంతి ఉత్సవాలు

అమెరికా: తెలుగుజాతి ఆత్మగౌరవాన్ని ప్రపంచానికి చాటిచెప్పిన మహానటుడు, తెలుగుదేశం పార్టీ వ్యవస్థాపకుడు, అభిమానుల ఆరాధ్య రాముడు నందమూరి తారక రామారావు 101వ జయంతి ఉత్సవాలను ఛార్లెట్‌లో ఘనంగా నిర్వహించారు. ఈ కార్యక్రమానికి  అభిమానులు, తెదేపా సానుభూతిపరులు హాజరై ఎన్టీఆర్‌కు ఘనంగా నివాళులర్పించారు.  ఇటీవల ఆంధ్రప్రదేశ్‌లో జరిగిన అసెంబ్లీ ఎన్నికల్లో తెలుగుదేశం పార్టీ విజయం కోసం ఛార్లెట్‌ నుంచి ఎంతోమంది ఎన్నారైలు ఆంధ్రప్రదేశ్‌కు వెళ్లి తమతమ నియోజకవర్గాల్లో తెదేపా తరఫున ప్రచారం చేసి వచ్చారు. ఈ కార్యక్రమానికి వచ్చినవారితో తమ అనుభవాలను పంచుకున్నారు. 

ఈ ఎన్నికల్లో తెదేపా విజయం సాధిస్తుందని, కూటమి ప్రభుత్వం అధికారంలోకి రావడం ఖాయమని విశ్వాసం వ్యక్తంచేశారు. ఎన్టీఆర్‌ స్థాపించిన తెదేపా, మాజీ సీఎం చంద్రబాబు నాయుడు ఆధ్వర్యంలోనే రాష్ట్ర ప్రగతి సాధ్యమన్నారు. ఈ కార్యక్రమానికి హాజరైనవారంతా ఎన్టీఆర్‌ నట విశ్వరూపాన్ని స్మరించుకుంటూ ఆయన నటించిన ఎన్నో సినిమాలు అందరి గుండెల్లో నేటికీ చెరగని ముద్ర వేశాయని తెలిపారు.