‘మహానాడు’కు మన్నవ మోహన కృష్ణ ₹25లక్షల విరాళం

అమరావతి: రాజమండ్రిలో జరగనున్న తెదేపా ‘మహానాడు’కు ఆ పార్టీ రాష్ట్ర కార్యనిర్వాహక కార్యదర్శి, నాట్స్‌ మాజీ అధ్యక్షుడు (USA) మన్నవ మోహన కృష్ణ విరాళం ప్రకటించారు. రూ.25లక్షల విరాళం చెక్కును తెదేపా అధినేత చంద్రబాబును కలిసి అందజేశారు. గతేడాది ఒంగోలులో జరిగిన మహానాడుకు సైతం ఆయన రూ.31లక్షల విలువ చేసే వాటర్‌ బాటిల్స్‌ను అందజేశారు.  గుంటూరు పశ్చిమ నియోజకవర్గ తెదేపా నేత అయిన మోహన కృష్ణను ఈ సందర్భంగా చంద్రబాబు అభినందించారు. ఎన్నో ఏళ్లుగా అటు అమెరికాలోను, ఇటు ఏపీలో తెదేపాకు అండగా ఉంటూ పార్టీ అభివృద్ధి కోసం ఎంతో శ్రమిస్తున్నారని ప్రశంసించారు. ఈ సందర్భంగా మోహన కృష్ణ మాట్లాడుతూ.. చంద్రబాబు మళ్లీ సీఎంగా అసెంబ్లీలో అడుగు పెట్టేవరకూ తాను అవిశ్రాంత సైనికుడిలా పనిచేస్తానన్నారు.