కాంగ్రెస్‌ అధ్యక్ష ఎన్నిక అప్పుడేనా?

దిల్లీ: కాంగ్రెస్‌ పార్టీ తదుపరి అధ్యక్షుడిని ఎన్నుకొనేందుకు జనవరి 2021లో ఏఐసీసీ సమావేశాన్ని నిర్వహించనున్నట్టు తెలిసింది. సోమవారం జరిగిన కాంగ్రెస్‌ వర్కింగ్‌ కమిటీ సమావేశంలో ఒక సంవత్సరం తర్వాత అధ్యక్ష ఎన్నిక నిర్వహించాలని కొందరు నేతలు ప్రతిపాదించగా.. రాహుల్‌ గాంధీ తదితరులు ఆరునెలల్లోనే ఈ కార్యక్రమం జరగాలని సూచించారు. కాగా, బిహార్‌ అసెంబ్లీ ఎన్నికల అనంతరం సమీపంలో ముఖ్యమైన ఎన్నికలేవీ లేనందున పార్టీ అధ్యక్ష ఎన్నికకు వచ్చే జనవరి అనుకూలమని నిర్ణయించారు.

పార్టీ అధ్యక్షురాలిగా ఆగస్టు 2019 నుంచి కొనసాగుతున్న సోనియా.. తనను ఆ పదవి నుంచి తప్పించాలని కోరిన సంగతి తెలిసిందే. దీనితో ఈ అంశాన్ని చర్చించేందుకు ఆ పార్టీ వర్కింగ్‌ కమిటీ సోమవారం సమావేశమైంది. పార్టీ అధ్యక్షుడిగా వేరే ఎవరినైనా నియమించాలని సోనియా ఈ సమావేశంలో కోరారు. అయితే కాంగ్రెస్‌ తాత్కాలిక అధ్యక్షురాలిగా మరికొంత కాలం సోనియా గాంధీయే కొనసాగాలంటూ... సుదీర్ఘ చర్చల అనంతరం సీడబ్ల్యూసీ నిర్ణయించింది. ఆనారోగ్యం తదితర అనివార్య కారణాలు ఎదురైతే ఆ బాధ్యత రాహుల్‌ గాంధీకి అప్పగించాలని పలువురు పార్టీ నేతలు కోరారు.