TIDCO Houses: మేం ఇళ్లు కట్టిస్తే.. వైకాపా రంగులు వేసుకుంది: యనమల రామకృష్ణుడు

రాజమహేంద్రవరం: వైకాపా ప్రభుత్వం గత నాలుగున్నరేళ్లలో పేదలకు ఎన్ని ఇళ్లు కట్టించిందో శ్వేతపత్రం విడుదల చేయాలని తెదేపా సీనియర్‌ నేత యనమల రామకృష్ణుడు డిమాండ్‌ చేశారు. రాజమహేంద్రవరంలో ఆయన మాట్లాడారు. తమ పాలనలో టిడ్కో ఇళ్లు పూర్తి చేస్తే.. వైకాపా ప్రభుత్వం రంగులు మాత్రమే వేసుకొని గొప్పలు చెబుతోందని దుయ్యబట్టారు. ఇలా మోసం చేసిన సీఎం జగన్‌ను గద్దె దింపేందుకు ప్రజలు సిద్ధంగా ఉన్నారన్నారు. 

‘‘ఎస్సీ, బీసీలకు సంక్షేమ పథకాలన్నీ రద్దు చేశారు. ఒకవైపు పథకాలన్నీ రద్దు చేసి.. మరోవైపు ఖజానా ఖాళీ చేశారు. ఈ నిధులన్నీ ఎవరి జేబుల్లోకి వెళ్లాయో లెక్కలు చెప్పాల్సిన అవసరం ఉంది. అప్పులు ఏ రాష్ట్రమైనా చేస్తుంది.. కానీ అక్కడ అభివృద్ధి కనిపించాలి. ఇళ్ల పట్టాల పేరుతో పేదల పేరు చెప్పి వైకాపా ప్రభుత్వం భూములు దోచుకుంటోంది’’ అని యనమల ఆరోపించారు.