Jasprit Bumrah: తండ్రైన బుమ్రా.. ఇన్‌స్టాలో ఫొటో షేర్‌ చేసిన క్రికెటర్‌

ఇంటర్నెట్‌ డెస్క్‌: టీమ్‌ఇండియా స్టార్‌ పేసర్‌ జస్ప్రీత్‌ బుమ్రా (Jasprit Bumrah) తండ్రయ్యాడు. ఆయన భార్య సంజనా గణేశన్‌ సోమవారం పండంటి మగబిడ్డకు జన్మనిచ్చారు. ఈ ఆనందకర విషయాన్ని బుమ్రా సామాజిక మాధ్యమాల్లో పంచుకుంటూ ఓ ఫొటో షేర్‌ చేశాడు.

‘‘మా చిన్న కుటుంబం పెరిగింది. మా హృదయాలు సంతోషంతో నిండిపోయాయి. ఈ రోజు ఉదయం మా చిన్నారి అంగద్‌ జస్ప్రీత్‌ బుమ్రాను ఈ ప్రపంచంలోకి ఆహ్వానించాం. ఇప్పుడు మా ఆనందానికి అవధుల్లేవు. తల్లిదండ్రులుగా మా జీవితాల్లో ప్రారంభమైన ఈ కొత్త అధ్యాయాన్ని ప్రతిక్షణం ఆస్వాదించేందుకు ఎదురుచూస్తున్నాం’’ అని బుమ్రా (Jasprit Bumrah) ఇన్‌స్టాలో రాసుకొచ్చాడు. ఈ సందర్భంగా బుమ్రా దంపతులు చిన్నారి చేతిని పట్టుకున్న ఫొటోను పంచుకున్నాడు. 

‘కోహ్లీ అంటేనే ఇష్టం’.. పాక్‌లో విరాట్‌ ఫ్యాన్‌గర్ల్‌ వీడియో వైరల్‌

దీంతో బుమ్రా దంపతులకు తోటి క్రికెటర్లు, అభిమానులు శుభాకాంక్షలు తెలియజేస్తున్నారు. క్రికెటర్లు సూర్య కుమార్‌ యాదవ్‌, దినేశ్‌ కార్తిక్‌, రోహిత్‌ శర్మ సతీమణి రితికా సజ్దే, యువరాజ్‌ సతీమణి హజెల్‌ కీచ్‌ తదితరులు బుమ్రా (Jasprit Bumrah)కు శుభాకాంక్షలు తెలిపారు. ఈ కారణంగానే ఆసియా కప్‌లో నేడు నేపాల్‌తో జరిగే మ్యాచ్‌కు బుమ్రా అందుబాటులో ఉండటం లేదన్న విషయం తెలిసిందే.

టీవీ పర్సనాలిటీ అయిన సంజనా గణేశన్‌ను బుమ్రా 2021 మార్చిలో వివాహం చేసుకున్నాడు. వెన్ను గాయంతో సుదీర్ఘకాలం క్రికెట్‌కు దూరంగా ఉన్న బుమ్రా.. ఇటీవల టీమ్‌ఇండియాలోకి పునరామనం చేశాడు.