క్వార్టర్స్‌లో భారత్‌

థామస్‌కప్‌ బ్యాడ్మింటన్‌

చెంగ్‌డూ (చైనా): ఉబెర్‌ కప్‌ బ్యాడ్మింటన్‌ టోర్నీలో ఇప్పటికే భారత అమ్మాయిలు క్వార్టర్స్‌ఫైనల్స్‌లో ప్రవేశించగా.. తాజాగా థామస్‌ కప్‌లో పురుషుల జట్టు కూడా తుది ఎనిమిదిలో చోటు దక్కించుకుంది. సోమవారం గ్రూప్‌-సి పోరులో భారత్‌ 5-0తో ఇంగ్లాండ్‌ను చిత్తు చేసింది. తొలి సింగిల్స్‌లో ప్రణయ్‌ 21-15, 21-15తో హ్యారీ హాంగ్‌ను ఓడించి శుభారంభం ఇచ్చాడు. మొదటి గేమ్‌లో ప్రణయ్‌ దూకుడుగా ఆడాడు. తన శైలిలో స్మాష్‌లు కొడుతూ 4-1 ఆధిక్యంలో నిలిచాడు. అదే జోరు కొనసాగిస్తూ 11-6తో బ్రేక్‌కు వెళ్లాడు. విరామం తర్వాతా ప్రణయ్‌దే జోరు. చక్కని ప్లేస్‌మెంట్లతో పాయింట్లు రాబట్టిన భారత స్టార్‌ 19-11తో ఆధిక్యంలోకి వెళ్లడమే కాక అదే ఊపులో గేమ్‌ గెలిచాడు. రెండో గేమ్‌లో హాంగ్‌ దూకుడుగా ఆడి 6-3తో నిలిచాడు. కానీ ప్రణయ్‌ పుంజుకున్నాడు. వరుస పాయింట్లు సాధించి 7-6తో ఆధిక్యంలో నిలిచాడు. విరామ సమయానికి 10-11తో స్వల్పంగా వెనుకబడినా.. బ్రేక్‌ తర్వాత ప్రణయ్‌ జోరు ప్రదర్శించాడు. క్రాస్‌కోర్టు షాట్లతో విజృంభించి 17-12తో నిలవడమే కాక అదే జోరుతో గేమ్‌తో పాటు మ్యాచ్‌ కైవసం చేసుకున్నాడు.

సాత్విక్‌ జోడీ కష్టంగా..: డబుల్స్‌లో సాత్విక్‌ సాయిరాజ్‌-చిరాగ్‌శెట్టి 21-17, 19-21, 21-15తో బెన్‌ లేన్‌-సీన్‌ వాండీ జోడీపై కష్టపడి గెలిచింది. మొదటి నుంచే బెన్‌-సీన్‌ జంట నుంచి భారత ద్వయానికి గట్టిపోటీ ఎదురైంది. అయినా తొలి గేమ్‌లో గెలిచి ఆధిక్యంలో నిలిచిన భారత జంటకు రెండో గేమ్‌లో ప్రత్యర్థి జంట నుంచి మరింత ప్రతిఘటన ఎదురైంది. దీంతో విరామ సమయానికి సాత్విక్‌ ద్వయం 8-11తో వెనుకబడింది. ఆ తర్వాత పోరాడి 18-19తో ప్రత్యర్థికి సమీపంగా వచ్చినా.. గేమ్‌ దక్కించుకోలేకపోయింది. నిర్ణయాత్మక మూడో గేమ్‌లో భారత జోడీకి పోటీ తప్పలేదు. ఒక దశలో స్కోరు 4-4తో సమమైంది. బ్రేక్‌ సమయానికి 11-8తో ఆధిక్యంలో నిలిచిన సాత్విక్‌ ద్వయం.. విరామం తర్వాత చెలరేగింది. ప్రత్యర్థి ద్వయం నుంచి పోటీ ఎదురైనా నిలిచి 19-14తో ఆధిక్యంలోకి వెళ్లడమే కాక.. అదే దూకుడుతో గేమ్‌తో పాటు మ్యాచ్‌ను కైవసం చేసుకుంది. రెండో సింగిల్స్‌లో కిదాంబి శ్రీకాంత్‌ 21-16, 21-11తో నదీమ్‌ దాల్వీపై, డబుల్స్‌లో అర్జున్‌-ధ్రువ్‌ కపిల ద్వయం 21-17, 21-19తో రోరీ ఈస్టన్‌-అలెక్స్‌ గ్రీన్‌ జంటపై గెలవడంతో భారత్‌ 4-0తో తిరుగులేని ఆధిక్యాన్ని సాధించింది. చివరి సింగిల్స్‌లో కిరణ్‌ జార్జ్‌ 21-18, 21-12తో చొలాన్‌ కయాన్‌పై నెగ్గి భారత్‌కు 5-0తో ఘన విజయాన్ని అందించాడు. బుధవారం చివరి గ్రూప్‌ పోరులో పద్నాలుగుసార్లు ఛాంపియన్‌ ఇండోనేషియాతో భారత్‌ తలపడనుంది.