Medicover Hospital: బబుల్‌-హెడ్‌ డాల్‌ సిండ్రోమ్‌.. న్యూరో ఎండోస్కోపిక్‌ సర్జరీతో చిన్నారికి నూతన జీవితం

రెజిమెంటల్‌బజార్: అత్యంత అరుదుగా వచ్చే బబుల్‌-హెడ్‌ డాల్‌ సిండ్రోమ్‌తో బాధపడుతున్న రెండున్నరేళ్ల చిన్నారికి న్యూరో ఎండోస్కోపిక్‌ సర్జరీతో నూతన జీవితాన్ని అందించినట్లు సికింద్రాబాద్‌ మెడికవర్‌ వైద్య నిపుణులు వెల్లడించారు. మంగళవారం ఆసుపత్రిలో ఏర్పాటు చేసిన విలేకరుల సమావేశంలో సీనియర్‌ కన్సల్టెంట్‌ న్యూరో సర్జన్‌ రమేష్‌ శిఘకొల్లి, వైద్యనిపుణులు భవానీశంకర్‌ శ్రీనివాస్, ప్రదీప్‌ ఈ వివరాలు వెల్లడించారు. 

‘‘నగరంలోని ఎల్‌బీనగర్‌కు చెందిన దంపతుల రెండున్నరేళ్ల కుమారుడు పుట్టుకతోనే హైడ్రోసెఫలస్‌ కారణంగా అరుదుగా కనిపించే బబుల్‌ హెడ్‌ డాల్‌ సిండ్రోమ్‌ వ్యాధితో బాధపడుతున్నాడు. మెదడులో అనేక నీటి బుడగలు ఉండడంతో సాధారణ పిల్లల్లా స్పందించలేకపోవడంతో పాటు మానసిక స్థితి సరిగా ఉండట్లేదు. కొన్ని రోజుల కిందట చిన్నారి తల్లిదండ్రులు మా వద్దకు రాగా అతడిని పరీక్షించి మెదడులో అనేక నీటి బుడగలతో తీవ్రమైన ఒత్తిడి కారణంగానే ఈ సమస్య ఏర్పడినట్లు గుర్తించాం. బాలుడికి న్యూరో సర్జరీ బృందం న్యూరో నావిగేషన్‌తో కూడిన అధునాతన న్యూరో ఎండోస్కోపీ ద్వారా సర్జరీ చేసింది. దీర్ఘకాలిక నియంత్రణ కోసం వైద్యులు ప్రోగ్రామబుల్‌ వీపీ స్టంట్‌ను అమర్చారు. శస్త్రచికిత్స విజయవంతం కావడంతో బాలుడు కోలుకుంటున్నాడు’’అని వైద్యులు తెలిపారు.