Weather Forecast: తెలంగాణలోనేడు, రేపు ఓ మోస్తరు వర్షాలు!

ఈనాడు, హైదరాబాద్‌: ఆగ్నేయ భారత ప్రాంతాల నుంచి తెలంగాణ వైపు తక్కువ ఎత్తులో గాలులు వీస్తుండడం, వాయువ్య భారత ప్రాంత వాతావరణంలో నెలకొన్న అస్థిరత ప్రభావంతో సోమ, మంగళవారాల్లో రాష్ట్రంలో అక్కడక్కడ ఒక మోస్తరు వర్షాలు కురిసే అవకాశాలున్నాయని వాతావరణశాఖ తెలిపింది. ఆదివారం ఉదయం 8 నుంచి రాత్రి 8 గంటల వరకూ 11 ప్రాంతాల్లో స్వల్పంగా వర్షాలు కురిశాయి. అత్యధికంగా బరంపూర్‌(ఆదిలాబాద్‌ జిల్లా)లో 2.2, దస్తురాబాద్‌(నిర్మల్‌)లో 1.1 సెంటీమీటర్ల వర్షం కురిసింది. ఉష్ణోగ్రత సాధారణం కన్నా 3 డిగ్రీల వరకూ పెరగడంతో చలి తీవ్రత కొంత తగ్గింది. ఆదివారం తెల్లవారుజామున అత్యల్పంగా తాళ్లపల్లి(రంగారెడ్డి జిల్లా)లో 15.3 డిగ్రీల ఉష్ణోగ్రత నమోదయింది. గాలిలో తేమ సాధారణం కన్నా ఎక్కువగా ఉంటోంది. ఉదయం పూట దట్టంగా పొగమంచు కురుస్తోంది.