పంచాయతీల్లో కంపోస్టు ఎరువు తయారీ

ముఖ్యకార్యదర్శి ఆదేశాలు

ఈనాడు, హైదరాబాద్‌: తెలంగాణలోని అన్ని గ్రామ పంచాయతీల్లో  తడి, పొడి చెత్తను వేరుచేసే ప్రక్రియను సక్రమంగా నిర్వహించాలని... నిరంతరాయంగా కంపోస్టు తయారీని కొనసాగించాలని పంచాయతీరాజ్, గ్రామీణాభివృద్ధి శాఖల ముఖ్య కార్యదర్శి సందీప్‌ సుల్తానియా ఆదేశించారు. గ్రామాల్లోని వైకుంఠధామాలకు విద్యుత్తు, నీరు, మరుగుదొడ్ల సౌకర్యాలు కల్పించాలని సూచించారు. శనివారం ఆయన జిల్లా పంచాయతీ అధికారులతో టెలి కాన్ఫరెన్స్‌ నిర్వహించారు. ఈ సందర్భంగా ఆయన మాట్లాడుతూ.. పంచాయతీ నర్సరీ, డంపింగ్‌యార్డు, ప్రకృతి వనం, క్రీడా ప్రాంగణం, వైకుంఠధామాలను సక్రమంగా నిర్వహించాలన్నారు. రాష్ట్ర, జిల్లా స్థాయి అధికారులు జిల్లాల్లో పర్యటించి ఆకస్మిక తనిఖీలు నిర్వహించాలని ఆదేశించారు.