పూజ గెలిచింది!

కాళ్లూ చేయీ లేకున్నా...షూటర్‌ అయ్యిందిలా...

‘ఒంటి చేత్తో’ సాధించడం అనే మాటకు అర్థం తెలియాలంటే పూజ గెలుపు కథ తెలుసుకోవాల్సిందే.ఓ ప్రమాదంలో కాళ్లూ, చేయీ కోల్పోయిన పూజ అయినవాళ్ల ఆదరణ లేకున్నా కుంగిపోకుండా షూటర్‌గా ఎదిగింది. ప్రపంచ పారాలింపియన్‌ షూటర్స్‌ జాబితాలోస్థానం సంపాదించి శెభాష్‌ అనిపించుకుంటోంది.
బీటెక్‌ పూర్తిచేసిన పూజ మేరఠ్‌లోని ఓ కాలేజీలో పాఠాలు చెప్పేది. ఆమెకు పెళ్లయ్యి అప్పటికి ఆరునెలలు అవుతోంది. భర్త దిల్లీలో పనిచేస్తాడు. కొత్త సంవత్సరంలో అతడిని కలవాలనుకుంది. ఆరోజు దిల్లీ బయలుదేరింది. అతడిని కలుసుకోబోతున్న ఉత్సాహంతో రైలు దిగి వడివడిగా ప్లాట్‌ఫామ్‌మీద అడుగులు వేస్తోందామె. అప్పటికే జనంతో రద్దీగా ఉంది స్టేషన్‌. తోపులాటలో ఎదురుగా వస్తోన్న ఓ గుంపు అకస్మాత్తుగా ఆమెను పక్కకి నెట్టింది. దాంతో పూజ పట్టాలపై పడిపోయింది. ఏం జరిగిందో తెలుసుకునేలోగానే వేగంగా ఓ రైలు పూజపై నుంచి వెళ్లిపోయింది. ఆ ప్రమాదంలో కాళ్లు చెయ్యి తెగిపడ్డాయి. రైల్వే పోలీసులు ఆమెని ఆసుపత్రికి తరలించారు. స్పృహ వచ్చి చూసేసరికి తనకేమైందో అర్థం చేసుకోవడానికి ఎక్కువ సేపు పట్టలేదు. ఇక తానెప్పటికీ ఒంటి చేత్తో వీల్‌ఛెయిర్‌లోనే గడపాల్సి వస్తుందనే ఆలోచన పూజకు ఊపిరాడనివ్వలేదు. ఆసుపత్రి నుంచి డిశ్చార్జి అయ్యాక నేరుగా అత్తింటికి వెళ్లింది. ఆదరిస్తాడనుకున్న భర్తలో క్రమంగా మార్పులు రావడం గమనించింది. తనను ఎలా వదిలించుకోవాలా అని ఆలోచిస్తున్న అత్తింటివారి మాటల్ని వింది. కొన్నాళ్లు బాధపడింది. కానీ తానెప్పటికీ అలానే ఉండిపోతే తన అస్తిత్వాన్ని కోల్పోతానని భయపడింది. మరేం చేయాలి.

గురి తప్పని లక్ష్యం... ఈ సంఘటన జరిగి ఇప్పటికి తొమ్మిదేళ్లవుతోంది.... తన ఆత్మాభిమానాన్ని చంపుకోకుండా ఉండాలంటే భర్తకు దూరంగా ఉండటమే మేలని నిశ్చయించుకుంది పూజ. అతడి నుంచి విడాకులు తీసుకుంది. అద్దెఇంటికి తల్లితో వెళ్లిపోయింది. ఇక, తన భవిష్యత్తుని అందంగా మలచుకోవడం తన చేతుల్లోనే ఉందని నమ్మింది. క్రమంగా రోజువారీ పనులన్నీ చేసుకోవడం మొదలుపెట్టింది. ఇతరులపై ఏ విషయంలోనూ ఆధారపడకూడదని అనుకుంది. మరీ ముఖ్యంగా ఆర్థిక విషయాల్లో! నడముకిందకి ఉండే తన జుట్టుని కురచగా కత్తిరించేసుకుంది. పోటీ పరీక్షలు రాయడం మొదలుపెట్టింది. అలహాబాద్‌ బ్యాంక్‌లో ప్రొబేషనరీ ఆఫీసర్‌గా ఉద్యోగం సంపాదించింది. అలాగని తన ప్రయాణాన్ని అక్కడితో సంతృప్తి పడి ఆపేయలేదు. జీవితంలో ఇంకా ఏదో సాధించాలనే ఆలోచనల్లో ఉన్న పూజకు క్రీడాకారిణి అయిన స్నేహితురాలు పారాలింపిక్స్‌ గురించి చెప్పింది. తనను తాను మార్చుకోవడానికి ఇదో చక్కటి అవకాశమని టేబుల్‌ టెన్నిస్‌లో శిక్షణ తీసుకుంది. కానీ కొద్దిరోజులకు ఆమెను షూటింగ్‌ బాగా ఆకర్షించిది. అందుకు అవసరమైన వస్తువులు, వీల్‌ చెయిర్‌... వంటివి మొదట అద్దెకు తెచ్చుకుని శిక్షణ ప్రారంభించింది. కొద్ది రోజుల్లోనే అక్కడ నైపుణ్యం సాధించింది. పోటీలకు సైతం వెళ్లేది. పారా షూటర్ల ర్యాంకింగ్‌లో ప్రస్తుతం ప్రపంచంలో 14వ స్థానం, ఆసియాలో 11వ స్థానంలో ఉంది పూజ. తన లక్ష్య సాధనలో శారీరక సామర్థ్యాన్ని పెంచుకునేందుకు యోగా నేర్చుకుంది. వ్యాయమాలు చేయడానికి తెల్లవారు జామున 4 గంటలకే నిద్రలేస్తుంది. 2017- దుబాయి పారా షూటింగ్‌ వరల్డ్‌కప్‌లో రజత పతకం అందుకున్న పూజ... ఎప్పటికైనా పారాలింపిక్స్‌లో స్వర్ణం సాధిస్తానంటోంది. ఇప్పుడిప్పుడే గతం తాలూకు గాయాల్నీ మరిచిపోగలుగుతుంది. ‘కన్నీళ్లు కష్టాల్ని పోగొట్టలేవు. నమ్మకమే ముందుకు నడిపించగలదు’ అని ఆత్మవిశ్వాసంతో చెప్పే పూజను అభినందించకుండా ఉండగలమా!

యూట్యూబ్‌ ఛానెల్‌తో...

కొవిడ్‌ కారణంగా చాలాకాలం ఇంటి నుంచే పనిచేసింది పూజ. ఆ సమయంలో పూజా అగర్వాల్‌ పీసీ క్రియేషన్స్‌ పేరుతో యూట్యూబ్‌ ఛానెల్‌ ప్రారంభించింది. ‘ప్రత్యేక అవసరాలున్నవారు ఏ పనీ చేయలేరని అపోహపడుతుంటారు. నేను ఒక్క చేత్తోనే అన్ని పనులూ చేస్తా. అదే అందరికీ చూపించాలనుకున్నా. వీడియోలు తీయడంలో అమ్మ సాయపడుతుంది. ఎడిటింగ్‌ నేనే చేస్తున్నా’ అంటోంది పూజ.

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

మరిన్ని

రుచులు

App