‘మనీ లాండరింగ్‌’ బూచిని చూపి రూ.25 కోట్లకు టోకరా

బాధితురాలు ఎంఎన్‌సీ విశ్రాంత డైరెక్టర్‌

ముంబయి: మనీ లాండరింగ్‌ కేసును బూచిగా చూపిన సైబర్‌ నేరగాళ్లు ముంబయిలో ఉండే ఓ బహుళజాతి కంపెనీ (ఎంఎన్‌సీ) విశ్రాంత మహిళా డైరెక్టర్‌ను సుమారు రూ.25 కోట్ల మేర మోసగించారు. నిందితుల బెదిరింపులకు భయపడిన బాధితురాలు తన పేరున, తన తల్లి పేరున ఉన్న షేర్లు, మ్యూచువల్‌ ఫండ్‌ పెట్టుబడులు విక్రయించారని, అంతేకాకుండా బంగారాన్ని తాకట్టు పెట్టి రుణాలు సైతం తీసుకున్నారని పోలీసులు తెలిపారు. ఈ ఏడాది ఫిబ్రవరి 6న మొదలైన ఈ తతంగం రెండు నెలల పాటు కొనసాగిందన్నారు. బాధితురాలికి ఫిబ్రవరిలో వాట్సప్‌ కాల్‌ వచ్చింది. మీపై నగదు అక్రమ చలామణీ నిరోధక చట్టం (పీఎంఎల్‌ఏ) కింద కేసు నమోదైందని, మీరు వినియోగిస్తున్న మొబైల్‌ నంబర్లు, ఆధార్‌ కార్డు కేసుతో లింక్‌ అయ్యాయని వృద్ధురాలిని బెదిరించాడు. ఆ తర్వాత కాల్‌ను మరో వ్యక్తికి బదిలీ చేశాడు. తనను తాను సీబీఐ అధికారిగా పరిచయం చేసుకున్న ఆ వ్యక్తి.. మీపై మనీలాండరింగ్‌ కేసు ఉందని చెప్పాడు. కేసు నుంచి బయట పడాలంటే తాము సూచించిన ఖాతాలో నగదు జమచేయాలని, ఆ తర్వాత ఆ మొత్తం వెనక్కి వస్తుందని నమ్మించాడు. అనంతరం మోసగాళ్లు బాధితురాలి పేరుతో కరెంటు ఖాతాను సైతం తెరిచి రూ.25 కోట్లు అందులో జమ చేయించుకున్నారు. అయితే ఆ మొత్తం వెనక్కి రాకపోవడంతో మోసపోయినట్లు గ్రహించి బాధితురాలు పోలీసులను ఆశ్రయించారు.