ఆ సువాసనలు వాడిన పూలవి!

ఓరుగల్లు పేరు చెబితే భద్రకాళి అమ్మవారే గుర్తుకు వస్తుంది.. ఆ అమ్మవారి పేరుతోనే తమ ఆర్థిక భద్రతకు బాటలు పరుచుకున్నారు వరంగల్‌ మహిళలు. వృథాగా పారవేసే పూల వ్యర్థాలతో ధూప్‌స్టిక్‌లు, అగర్‌బత్తీలు, బొమ్మలు తయారు చేస్తూ తమ బ్రాండ్‌ని తెలుగు రాష్ట్రాల్లో విస్తరించేందుకు ఉత్సాహంగా అడుగులు వేస్తున్నారు...

పూల జీవితం ఒక్కరోజే. తర్వాత రోజుకి అవి వ్యర్థాలే. కానీ వాటితోనే అద్భుతాలు చేస్తూ చక్కని వ్యాపారానికి శ్రీకారం చుట్టారు వరంగల్‌ మహిళలు. వరంగల్‌ నగరంలోని దేవాలయాల్లో వాడేసిన పూల దండలూ, హోల్‌సేల్‌ పూల వ్యాపారుల నుంచి సేకరించిన పూల వ్యర్థాలే వీళ్ల ముడిసరకు. ఈ పూలను నాలుగైదు రోజుల పాటు ఎండబెడతారు. ప్రత్యేక మెషీన్లలో పిండిలా మెత్తగా మరపడతారు. దీనికి చందనం పొడి, రోజ్‌ పౌడర్‌ కలిపి ధూప్‌స్టిక్‌లకు తయారు చేస్తున్నారు. ఒక్కో ప్యాకెట్‌ ధర రూ.35లు. ఒక్క ధూప్‌స్టిక్‌లు మాత్రమే కాదు ప్రమిదలు, బొమ్మలు కూడా పూల వ్యర్థాలతో తయారు చేస్తున్నారు.

ఇందుకోసం ఏడాది క్రితం వరంగల్‌ పట్టణ పేదరిక నిర్మూలన సంస్థ(మెప్మా) ఆధ్వర్యంలో నెలరోజుల పాటు ప్రత్యేకంగా శిక్షణ తీసుకొన్నారు. వరంగల్‌ పోతననగర్‌ సామాజిక భవనంలో తయారీ యూనిట్‌ని ఏర్పాటు చేసుకుని.. తమ యూనిట్‌కి భద్రకాళి ధూప్‌స్టిక్స్‌ అనే పేరు పెట్టుకున్నారు. ఏడాది నుంచి విజయవంతంగా ఉపాధి పొందుతూ ఒక్కో మహిళా నెలకి ఐదు వేల రూపాయల ఆదాయం పొందుతోంది. గత సంవత్సరం ఆగస్టు నెలలో పూల వ్యర్థాలతో గణపతి విగ్రహాలు తయారు చేసి గ్రేటర్‌ వరంగల్‌ ఆధ్వర్యంలో అందరికీ ఉచితంగా పంపిణి చేసి తమ పర్యావరణ ప్రేమను చాటుకున్నారు. దీపావళి పండగ సమయంలో ప్రమిదలు తయారు చేశారు. 15 ప్రమిదలు, ఒక ధూప్‌ స్టిక్‌ ప్యాకెట్‌ కలిపి రూ.150లకు అమ్మారు. ప్రస్తుతం ఈ మహిళలంతా తమ ఉత్పత్తులని వరంగల్‌లోని ప్రధాన ఆలయాల్లో అమ్ముతూ... తమ బ్రాండ్‌ని రాష్ట్రమంతా విస్తరించాలని చూస్తున్నారు.

-బత్తిని సుభాష్‌, వరంగల్‌

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

మరిన్ని

రుచులు

App