రక్షణ కిట్లు.. ఉపాధికి మెట్లు

అవీ ఇవీ...

రక్షణ కిట్లు.. ఉపాధికి మెట్లు

బీడీలు చుడితే గానీ రోజు గడవని సంసారాలు వాళ్లవి. లాక్‌డౌన్‌తో బీడీలకు బేడీలు పడ్డాయి. ఇప్పుడెలా? తంబాకు కత్తిరించడంలో చాకచక్యత.. ఉపాధి మార్గమైంది. దారం చుట్టడంలో వేగం.. ఆదాయానికి దారి చూపింది. కరోనా కట్టడికి రక్షణ కవచాలు సిద్ధం చేస్తూనే.. నాలుగురాళ్లు సంపాదిస్తున్నారు ఈ మహిళలు.

కామారెడ్డి జిల్లా దోమకొండ మండల కేంద్రంలో కుట్టుమిషన్ల చప్పుడు వినిపిస్తోంది. ఓవైపు చకచకా వస్త్రాన్ని కత్తిరిస్తున్నారు కొందరు. మరోవైపు టకటకా మిషన్‌పై కుట్టేస్తున్నారు ఇంకొందరు. కొన్నాళ్లు వెనక్కి వెళ్తే.. ఈ మహిళలంతా చడీచప్పుడు లేకుండా బీడీలు చుడుతూ ఉండేవారు. లాక్‌డౌన్‌ మొదలైనప్పటి నుంచి ఉపాధి కరవైంది. ఇల్లు గడవడం కష్టమైంది. గడీకోట ట్రస్టు నిర్వాహకులు ఓ ఆలోచన చేశారు. మహిళలకు ఉపాధి కల్పించే ఉద్దేశంతో పీపీఈ (పర్సనల్‌ ప్రొటెక్షన్‌ ఎక్విప్‌మెంట్‌) కిట్ల తయారీని మొదలుపెట్టారు. రక్షణ కిట్లతో పాటు, మాస్కుల తయారీపై అవగాహన కల్పించారు. ముడిసరకు తెప్పించి వారికి పని కల్పించారు. దాదాపు 200 మందికిపైగా మహిళలు ఉపాధి పొందుతున్నారు. వస్త్రాన్ని కట్‌ చేసినందుకు గానూ ఒక్కో కిట్‌కు రూ.15-రూ.20, కుట్టినందుకు రూ.50 చొప్పున చెల్లిస్తున్నారు. ఇప్పటికే 1200 కిట్లు కుట్టేశారు. మరో 5,000 కిట్ల తయారీలో నిమగ్నమయ్యారు. నాణ్యతా ప్రమాణాలు పాటిస్తూ సిద్ధం చేస్తున్నారు. ఇక్కడ రూపొందించిన కిట్లను హైదరాబాద్‌తో పాటు షోలాపూర్‌ తరలిస్తున్నారు. ఉపాధి భారమైన లాక్‌డౌన్‌ కాలంలో.. దోమకొండ మహిళలు రోజుకు రూ.400 వరకూ సంపాదిస్తున్నారు.

- పులి అనిల్‌కుమార్‌, ఈనాడు డిజిటల్‌, కామారెడ్డి

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

అవీ ఇవీ...

మరిన్ని

రుచులు

App