ఈ డాక్టర్‌ ఖాదీకి కొత్త ఊపిరిలూదుతోంది
close
Published : 30/08/2021 00:31 IST

ఈ డాక్టర్‌ ఖాదీకి కొత్త ఊపిరిలూదుతోంది

ఖాదీ పేరెత్తితే... ఒకప్పుడు అమ్మో ముతక ఖద్దరా అనే యువతరం... ఇప్పుడు దాంతోనే ప్రయోగాలు చేస్తోంది. దాన్నే ట్రెండ్‌గా భావిస్తోంది. అంతేనా! దానికి ఆధునిక సొగసులు, సంప్రదాయ కళలను జతచేర్చి అద్భుతాలు సృష్టిస్తోంది. ఆమే వైజాగ్‌కి చెందిన డాక్టర్‌ గంగూరి ఐశ్వర్య. ఖాదీతో చేసిన చీరలు, గౌనులు, ఇండోవెస్ట్రన్‌ సూట్‌లకు తోలుబొమ్మల కళారూపాలను కలగలిపి కొత్త ఆవిష్కరణలకు తెరతీసింది. వాటికి దేశవిదేశాల్లో ప్రాచుర్యం కల్పిస్తోంది. ఆ వివరాలను వసుంధరతో పంచుకుందిలా...

ఫ్యాషన్‌లు, ట్రెండ్‌లు వంటివాటిపై నాకు చిన్నప్పటి నుంచే ఆసక్తి ఎక్కువ. అమ్మ, అమ్మమ్మ ఎంబ్రాయిడరీ చేసేవారు. దుస్తులూ కుట్టేవారు. వారి ప్రభావం నామీదా ఉండేది. రెండో తరగతిలో ఉండగా...నా పుట్టిన రోజు గౌను డిజైన్‌ ఎలా ఉండాలో నిర్ణయించుకున్నా. మెడ చుట్టూ వేయాల్సిన స్వరోస్కీ స్టోన్ల పరిమాణం, ఆకృతి వంటివన్నీ నేనే ఎంపిక చేసుకోవడంతో అంతా ఆశ్చర్యపోయారు. ఆ అభిరుచి నాతో పాటూ పెరుగుతూ వచ్చింది. కళలపైనా పట్టు ఉండాలనే ఇష్టంతో అమ్మానాన్నలు నన్ను డ్యాన్స్‌, సంగీతం తరగతులకీ పంపేవారు. ఓ పక్క చదువు, మరోక్క హాబీలు నేర్చుకునేందుకు సమయం కేటాయించేదాన్ని. ఎనిమిదో తరగతిలో ఉండగా కుట్టుపని నేర్చుకున్నా. అయితే కెరియర్‌గా ఫ్యాషన్‌ డిజైనింగ్‌ ఎంచుకోవడానికి అమ్మ ఇష్టపడలేదు. మా తాతగారికి నన్ను డాక్టర్‌గా చూడాలన్నది కల. కానీ అది పూర్తయ్యేంతవరకూ వేచి చూడటం నా వల్ల కాలేదు. అందుకే సమాంతరంగా ఫ్యాషన్‌ పట్టా అందుకున్నా. అయితే అందరిలా బొటిక్‌ పెట్టి కస్టమైజ్డ్‌ దుస్తులు కుట్టివ్వడం కాకుండా కాస్త భిన్నంగా ఏదైనా చేయాలనుకున్నా. అలా మన సంప్రదాయ చేనేత, ఖాదీ రకాలకు ప్రాచుర్యం కల్పించాలనుకున్నా. దాంతో వినూత్న ప్రయోగాలు చేయడం మొదలుపెట్టా. ముఖ్యంగా దీనికి ఇప్పుడిప్పుడే కాలం కలిసొస్తోంది. ముతకగ్గా ఉంటుందన్న అపోహను పోగొట్టడానికి రంగులద్ది రకరకాల ప్రయోగాలు చేశా. సంప్రదాయ రకాలతో పాటు ఇండ్రోవెస్ట్రన్‌లోనూ ఇది చక్కగా ఇమిడిపోతుందన్నది చూపించాలనేదే నా ప్రయత్నం.

తోలుబొమ్మలతో...

ఈ ప్రయోగాల్లో ముఖ్యంగా అంతరించిపోతున్న కళారూపాల్ని ఖాదీ వస్త్రాలకు మేళవించి ఆకర్షణీయమైన డిజైన్లెన్నో రూపొందించా. వాటిలో తోలు బొమ్మలు కూడా ఒకటి. ఇందుకోసం అనంతపురం జిల్లాలోని నిమ్మలకుంట గ్రామం వెళ్లొచ్చా. అక్కడి నుంచే వాటిని తెప్పించుకుంటా. వాటిని జతచేసి చేసిన చీరలు, కుర్తీలు, గౌన్లు... వంటివెన్నో డిజైన్‌ చేశా. నూలుతో ట్రెండీ నగలను రూపొందించా. వీటికి చక్కటి ఆదరణ లభించింది. దేశవిదేశాల నుంచి ఎన్నో ఆర్డర్లూ అందుకున్నా. మరింత ప్రాచుర్యం కల్పించేందుకు ఈ వస్త్రశ్రేణిని దేశవ్యాప్తంగా ఫ్యాషన్‌ వేదికలపై ప్రదర్శించా. 2018లో అమెరికా నుంచి మిస్‌ యూనివర్సిటీ పోటీలకు ఎంపికైన మిస్‌ క్లారిసా బోవర్స్‌కు తేలికైన ‘ఖాదీ పట్టు బాల్‌గౌన్‌’ బహుకరించా. ఆమె నన్ను కలవడానికే ప్రత్యేకంగా వైజాగ్‌ వచ్చింది. క్లారిసా... ‘తన జీవితంలోనే అందమైన కానుక ఆ గౌను’ అని చెప్పడం నాకెంతో తృప్తినిచ్చింది. ఖాదీకి పూర్వవైభవం తీసుకురావడానికి చేసిన ప్రయోగాలు నాకు గుర్తింపుని తెచ్చిపెట్టాయి. 2019లో ‘ఖాదీ డిజైన్‌ కౌన్సిల్‌ ఆఫ్‌ ఇండియా’(కె.డి.సి.ఐ.) నుంచి ‘ఉత్తమ ఖాదీ డిజైనర్‌ ఆఫ్‌ ది ఇయర్‌’ అవార్డు అందుకున్నా.  అంతేకాదు కె.డి.సి.ఐ. ఆంధ్రప్రదేశ్‌ రాష్ట్ర సంయుక్త కార్యదర్శిగానూ నియమితురాలినయ్యాను.

క్షేత్రస్థాయిలో పని...

మా డిజైన్లకోసం ప్రధానంగా మస్లిన్‌ క్లాత్‌ వాడుతుంటా. ఇందుకోసం తెలుగురాష్ట్రాలతో పాటు దేశవ్యాప్తంగా వివిధ ప్రాంతాల్లోని చేనేత పని వారితో కలిసి పని చేస్తున్నా.  నేను కూడా కొన్నాళ్లక్రితం తూర్పుగోదావరి జిల్లాలోని ఏడిద గ్రామంలో నేతపనీ నేర్చుకున్నా. ఆసక్తి ఉన్నప్పుడు ఏదీ కష్టం కాదు...అందుకే దంత వైద్యురాలిగా ప్రాక్టీస్‌ చేస్తూనే, మరో పక్క డిజైనర్‌గానూ కెరియర్‌ని తీర్చిదిద్దుకుంటున్నా.


సంగీతం-నృత్యంలోనూ..: నాన్న వెంకట రవీంద్రనాథ్‌ వ్యాపారవేత్త. అమ్మ లక్ష్మీ సుజాత ఫ్యాషన్‌ డిజైనర్‌. మూడేళ్ల వయసు నుంచే నృత్యం నేర్చుకోవడం మొదలుపెట్టా, కూచిపూడి శ్రీహరి బాలాదిత్య, బాలకొండలరావు, అనుకూల ఆదిత్యల వద్ద నేర్చుకున్నా. అలానే టోనీ మాస్టర్‌ వద్ద వెస్ట్రన్‌ డ్యాన్స్‌లో శిక్షణ తీసుకున్నా. వైజాగ్‌లోని డి.వి.ఎన్‌.కళాక్షేత్రంలో కర్ణాటక సంగీతం సాధన చేశాను. ఇప్పటివరకూ సుమారు 500 నృత్యప్రదర్శనలిచ్చాను. ఓ పక్క దంత వైద్యం చేస్తూనే ఫ్యాషన్‌ డిజైనింగ్‌లోనూ సాగుతున్నా. ఒకేసారి ఇన్ని పనులు చేయడం నాకే మాత్రం కష్టంగా లేదు. ఎందుకంటే ఇష్టంగా చేస్తే అలసట తెలియదు కదా!

- బి.ఎస్‌.రామకృష్ణ, విశాఖపట్నం


Advertisement


మరిన్ని

నారీ... వ్యాయామ దారి!

ఇంట్లో పనే ఎక్సర్‌సైజు... ఒక గృహిణి అభిప్రాయం. ఆఫీసుకెళ్లొచ్చే సరికే టైం అయిపోతుంది. మళ్లీ జిమ్‌కు వెళ్లే తీరిక ఎక్కడిది? ఒక ఉద్యోగిని ఆవేదన. జిమ్‌ కెళ్లినా అక్కడ మగవాళ్లతో పాటు చేయలేం... ఇదో యువతి సమస్య... ఆరోగ్యాన్ని కాపాడుకోవాలనే ఆలోచన ఉంటే మార్గాలు బోలెడు ఉన్నాయంటున్నారు...జీరోసైజ్‌ లేదా సన్నగా, నాజూగ్గా ఉండాల్సిన అవసరం సినీతారలు, మోడల్స్‌కు మాత్రమే. మేమెందుకు నోరు కట్టేసుకోవాలి, కసరత్తులంటూ చెమటోడ్చాలి అనే భావన చాలా మంది మహిళల్లో ఉండేది. గృహిణులకు ఇంటిపనే సరిపోతుందిలే’ అనే అపోహ ఉండేది. ఇప్పుడు మహిళలకూ ఉద్యోగ, ఉపాధి అవకాశాలు పెరగటంతో జీవనశైలిలో మార్పులు వచ్చాయి.

తరువాయి

చదువుల రాణి.. పసిడి కొల్లగొట్టింది..!

సాధారణంగా చదువులో ముందున్న వారు ఆటల్లో వెనకబడతారు.. అదే ఆటల్లో ముందున్న వారు చదువులో రాణించరు.. అంటుంటారు. కానీ చదువులో, ఆటల్లో.. రెండింట్లోనూ సత్తా చాటే వారు చాలా అరుదుగానే ఉంటారు. ఆస్ట్రియా సైక్లిస్ట్‌ అన్నా కిసెనోఫర్‌ కూడా అలాంటి మహిళే! వృత్తిరీత్యా గణిత విద్యావేత్త అయిన ఆమె.. అండర్‌ డాగ్‌గా టోక్యో ఒలింపిక్స్‌ బరిలోకి దిగింది. అందరి అంచనాల్ని తలకిందులు చేస్తూ ఫైనల్‌ ఫేవరెట్‌ను చిత్తు చేసి పసిడి పతకాన్ని కొల్లగొట్టింది. ఫలితంగా 125 ఏళ్లలో సైక్లింగ్‌ విభాగంలో ఒలింపిక్స్‌ పతకం గెలుచుకున్న తొలి ఆస్ట్రియా అథ్లెట్‌గా చరిత్ర సృష్టించింది. దీంతో ఆమె పేరు ప్రపంచమంతా మార్మోగిపోతోంది.

తరువాయి

సైకిల్‌ తొక్కితే రాళ్లు విసిరారు.. చంపేస్తామన్నారు!

అఫ్గానిస్థాన్‌కు చెందిన ఆమె చిన్నతనంలోనే సైకిల్‌ నేర్చుకుంది. అందులోనే జీవితాన్ని వెతుక్కోవాలనుకుంది. కానీ అక్కడి తాలిబన్లు, మత ఛాందసవాదులు ‘ఆడపిల్లలు సైకిల్‌ తొక్కడమేంటి?’ అంటూ ఆమె ఆశయానికి అడ్డుపడ్డారు. ధైర్యం చేసి సైకిల్‌తో రోడ్డుపై కొస్తే రాళ్లు విసిరారు. చంపేస్తామని బెదిరించారు. అందుకే ఉన్న వూరును విడిచిపెట్టి ప్రాణాలు అరచేతిలో పెట్టుకుని ఫ్రాన్స్‌కు వలస వెళ్లిపోయింది. అక్కడే తన సైక్లింగ్‌ లక్ష్యానికి మెరుగులు దిద్దుకుంది. ప్రతిష్ఠాత్మక ఒలింపిక్స్‌లో శరణార్థుల జట్టు తరఫున పాల్గొనే సువర్ణావకాశం సొంతం చేసుకుంది. ఆమే 24 ఏళ్ల మసోమా అలీ జాదా.

తరువాయి

సృజనాత్మక పరిష్కారానికి అరుదైన పురస్కారం!

యూరోపియన్‌ ఇన్వెంటర్‌ అవార్డ్‌.. వివిధ రంగాల్లో ఆవిష్కరణలు చేసి ఓ సరికొత్త ట్రెండ్‌ క్రియేట్‌ చేసిన వారికి ఏటా అందించే ప్రతిష్ఠాత్మక పురస్కారమిది! ఐరోపాతో పాటు ఇతర దేశాల వారు చేసిన అద్భుత ఆవిష్కరణల్ని గుర్తించి.. వాటి సృష్టికర్తలకు బహూకరించే ఈ పురస్కారం ఈసారి భారత సంతతికి చెందిన రసాయన శాస్త్రవేత్త సుమితా మిత్రాను వరించింది. ‘నాన్‌ యూరోపియన్‌ పేటెంట్‌ ఆఫీస్‌ కంట్రీస్‌’ విభాగం కింద యూరోపియన్‌ పేటెంట్‌ ఆఫీస్‌ (EPO) ఆమెకు ఇటీవలే ఈ అవార్డు అందించింది. దంత వైద్యంలో భాగంగా ఆమె చేసిన ఓ అసాధారణ ఆవిష్కరణతో ఎంతోమంది దంత సమస్యలకు పరిష్కారం దొరికినట్లయింది. ఈ నేపథ్యంలోనే ఈ అరుదైన అవార్డు అందుకున్న సందర్భంగా ఈ ఇండో-అమెరికన్‌ గురించి కొన్ని విశేషాలు మీకోసం..

తరువాయి

బ్యూటీ & ఫ్యాషన్

మరిన్ని

ఆరోగ్యమస్తు

మరిన్ని

అనుబంధం

మరిన్ని

యూత్‌ కార్నర్

మరిన్ని

మంచిమాట


'స్వీట్' హోం

మరిన్ని

వర్క్‌ & లైఫ్

మరిన్ని