షోలాపూర్‌పై తెలుగింటి ముద్ర!

మహిళా జయహో

ఎవరీమె: ఈమె పేరు ఎన్నం శ్రీకాంచన రమేష్‌. వయసు 46. ఉండేది మహారాష్ట్రలోని షోలాపూర్‌లో.

ఈమె గురించి ఎందుకు తెలుసుకోవాలి?: తాను నివసించే నగరానికి మేయర్‌గా ఎన్నికయ్యారీమె. అయితే ఏంటట అంటారా? ఈమె అచ్చతెలుగు ఆడపడుచు.

సంగారెడ్డిజిల్లా సదాశివపేట నుంచి 70 సంవత్సరాల క్రితం భారతదేశ వస్త్రవ్యాపార కేంద్రం అయిన షోలాపూర్‌కు వచ్చి వీళ్ల కుటుంబం స్థిరపడింది. రగ్గులు, తువాళ్లు తయారుచేస్తూ అంచెలంచెలుగా ఎదుగుతూ పారిశ్రామిక రంగంలో నిలదొక్కుకుంది. శ్రీకాంచన భర్తకూడా ఈ వ్యాపారంలోనే ఉన్నారు.

వారి కష్టం తెలుసుకుని: శ్రీకాంచన భర్త రమేష్‌ మొదట్నుంచీ సామాజిక, సేవారంగాల్లోనే ఉన్నారు. ఆ స్ఫూర్తినే కాంచన అందిపుచ్చుకున్నారు. భర్త ప్రోత్సాహంతోనే 1997లో భాజపా సభ్యత్వం తీసుకున్నారు. అప్పట్నుంచి సమస్యలను తెలుసుకోవడం, బాధితులకు చేయూతనందించడం ఆమె రోజువారీ విధులుగా మారాయి. తాను నివసించే ‘ఆకాశవాణి కేంద్ర’ ప్రాంతంలో కౌన్సిలర్‌గా నాలుగుసార్లు ఎన్నికయ్యారు. ఇది నగర శివారులో ఉంటుంది. ఇక్కడివారి కష్టాలెవరూ పట్టించుకొనేవాళ్లు కాదు. తాగునీటి సౌకర్యం, పరిశుభ్రత, రహదారులు, లైట్లు, మూత్రశాలల కొరత వంటి సమస్యలని పరిష్కరించి ప్రజల మనసులో చెరగని ముద్ర వేశారు. ఏ సమయంలో తన ఇంటి తలుపుతట్టినా వారి సమస్యలు పరిష్కరించి అందరితో శభాష్‌ అనిపించుకున్నారు. ఇప్పుడు నగరం మొత్తానికి పెద్ద దిక్కుగా మారారు.

‘నా ముందు చాలా లక్ష్యాలున్నాయి. ఇక్కడ దాదాపు 70 శాతం మంది మహిళలు బీడీల తయారీ, రగ్గులు కుట్టడం వంటి పనుల్లో ఉంటారు. కాస్త స్థితిమంతులయిన మహిళలకు కూడా పనిచేసే మనస్తత్వం ఉంటుంది. ఎవరూ ఖాళీగా ఉండరు. వీరందరికీ ఆరోగ్యం, పరిశుభ్రత, నెలసరి సమయంలో తీసుకోవాల్సిన జాగ్రత్తలు వంటి అంశాలపై పూర్తి అవగాహన తీసుకురావాలి. పిల్లలందరినీ బడికి పంపేలా చేసి, నిరక్షరాస్యతను పూర్తిగా తరిమికొట్టాలి’.

Tags :