గీత దాటినోడే..

స్పోర్ట్స్‌ స్టార్‌

గీత దాటినోడే..

2016 కొరియాతో పోరు ముందు డేవిస్‌కప్‌ ప్రాక్టీస్‌ సెషన్‌.. సీనియర్లందరూ కోర్టులో ఉన్నారు.. జట్టులో అందరికన్నా చిన్న అయిన ఆ కుర్రాడు మాత్రం రాలేదు..! 2017లో న్యూజిలాండ్‌ డేవిస్‌కప్‌ పోరు.. మళ్లీ ఆ కుర్రాడిది అదే తంతు.. ఈ రెండు సంఘటనలే కాదు.. సీరియస్‌గా ప్రాక్టీస్‌ సెషన్‌ నడుస్తుంటే అనుమతి లేకుండా ప్రియురాలిని తీసుకుని రావడం, మద్యం సేవించడం లాంటి సంఘటనలతో అప్పటి కోచ్‌ ఆనంద్‌ అమృత్‌రాజ్‌ ఆ కుర్రాడిని డేవిస్‌కప్‌ జట్టు నుంచి తప్పించాడు.. ఇలా ఆరంభంలోనే క్రమశిక్షణ రాహిత్యంతో కెరీర్‌ను ప్రశ్నార్థంగా మార్చుకున్న ఈ కుర్రాడు పునరాగమనంలో సత్తా చాటుతాడని అనుకుంటామా? గ్రాండ్‌స్లామ్‌ టోర్నీలో ఒక దిగ్గజ ఆటగాడితో తలపడి సెట్‌ గెలవడాన్ని ఊహించగలమా? కానీ అతను చేసి చూపించాడు.. యుఎస్‌ ఓపెన్లో స్విస్‌ గ్రేట్‌ రోజర్‌ ఫెదరర్‌తో ఆడి తొలి సెట్‌ గెలిచి అందర్ని ఆశ్చర్యపరిచాడు. ఆ కుర్రాడే సుమిత్‌ నాగాల్‌. ఈ దిల్లీ యువ సంచలనం భారత టెన్నిస్‌లో భవిష్యత్‌ తారగా ఎదుగుతున్నాడు.
క్రికెట్‌ నుంచి..
భారత్‌లో ఎక్కువమంది కుర్రాళ్లలాగే సుమిత్‌ ఆరంభంలో క్రికెట్‌ బ్యాటే పట్టాడు. అయితే అతనికి టెన్నిస్‌ నేర్పించాలని తండ్రి సురేశ్‌ కోరిక. ఏడేళ్ల వయసులో సుమిత్‌ను దిల్లీలోని డీడీఏ టెన్నిస్‌ అకాడమీలో అతణ్ని చేర్పించాడు. తండ్రి అంచనాలను నిలబెడుతూ సుమిత్‌ ఆరంభంలోనే సత్తా చాటాడు. హైదరాబాద్‌లో జరిగిన అండర్‌-12 టోర్నీలో సుమిత్‌ సత్తాచాటాడు. అక్కడ నుంచి మొదలుకొని సుమిత్‌ అవకాశం వచ్చిన ప్రతిసారి ప్రతిభ నిరూపించుకుంటూనే ఉన్నాడు. మెరుపు ఫోర్‌ హ్యాండ్‌ షాట్లు, నెట్‌ దగ్గరకు దూసుకొస్తూ వేసే డ్రాప్‌లు, పదునైన సర్వీస్‌లు సుమిత్‌ బలం.
భూపతి తోడుగా..
సుమిత్‌ ఎదుగుదలలో భారత మాజీ డబుల్స్‌ స్టార్‌ మహేశ్‌ భూపతి పాత్ర ఎంతో ఉంది. 2008లో కెనడా కోచ్‌ బాబీ మహల్‌తో కలిసి నిర్వహించిన ప్రతిభాన్వేషణ కార్యక్రమంలో సుమిత్‌ను కనుగొన్న భూపతి.. ప్రత్యేక శ్రద్ధ తీసుకుని అతణ్ని మంచి ఆటగాడిగా తీర్చిదిద్దాడు. ఆ తర్వాత సుమిత్‌ను 2011లో మెరుగైన శిక్షణకు కెనడా పంపాడు. అక్కడ మూడేళ్లు శిక్షణ తీసుకున్న నాగాల్‌... ఆ తర్వాత జర్మనీకి వెళ్లి మారియానో డెల్ఫానో (అర్జెంటీనా) దగ్గర కోచింగ్‌కు చేరాడు. ఈ శిక్షణల ఫలితం అతనికి త్వరగానే వచ్చింది. 2015లో లే హొయాంగ్‌తో కలిసి వింబుల్డన్‌ డబుల్స్‌ టైటిల్‌ గెలిచాడు సుమిత్‌. ఆ తర్వాత 2017లో బెంగళూరు ఓపెన్లోనూ విజేతగా నిలిచాడు. వైల్డ్‌కార్డ్‌ ఎంట్రీగా బరిలో దిగి ఇదే టోర్నీలో తనకన్నా సీనియర్‌ అయిన యుకి బాంబ్రిని ఓడించాడు. వరుస విజయాలు సాధిస్తున్నా.. క్రమశిక్షణ తప్పాడనే చెడ్డపేరు అతని కెరీర్‌కు ఇబ్బందిగా మారింది. ఈ మచ్చను చెరిపేస్తూ గ్రాండ్‌స్లామ్‌ టోర్నీ సింగిల్స్‌ మెయిన్‌డ్రాకు అర్హత సాధించడమే కాక.. తొలి మ్యాచ్‌లో దిగ్గజ ఫెదరర్‌కు గట్టిపోటీ ఇచ్చాడు. ‘మంచి భవిష్యత్‌ ఉంది ఈ కుర్రాడికి’ అని ఫెదరర్‌తోనే కితాబు అందుకున్నాడు.

పేరు: సుమిత్‌ నాగాల్‌
పుట్టింది: జైత్‌పుర్‌, హరియాణా, ప్రస్తుత నివాసం దిల్లీ
కోచ్‌, మార్గనిర్దేశకుడు: మహేశ్‌ భూపతి
ఆరాధ్య ఆటగాడు: రోజర్‌ ఫెదరర్‌
వెలుగులోకి వచ్చింది: 2015 వింబుల్డన్‌ జూనియర్స్‌ డబుల్స్‌ టైటిల్‌ గెలవడంతో
ప్రస్తుత సింగిల్స్‌ ర్యాంకు: 190

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

స్పోర్ట్స్‌ స్టార్‌

మరిన్ని

రుచులు

App