చిన్నదేశాల పెద్ద అడుగు

కొవిడ్‌పై స్ఫూర్తిదాయక పోరు

అంతకంతకూ వేగంగా విస్తరిస్తున్న కొవిడ్‌ మహమ్మారి- అన్ని దేశాల ఆరోగ్య వ్యవస్థల సామర్థ్యాలకూ సవాళ్లను పెంచుతోంది. ఇప్పటికే చాలా దేశాలు వైరస్‌ వ్యాప్తిని కట్టడి చేసేందుకు కఠిన చర్యలు తీసుకున్నాయి. కొన్ని దేశాలు విభిన్న తరహా మార్గాలను అనుసరించడం ద్వారా కొవిడ్‌ ను ఎదుర్కోవడంలో మరో అడుగు ముందుకేశాయి. దక్షిణ, ఆగ్నేయాసియా ప్రాంతంలో చాలా దేశాలు వ్యాధిని కట్టడి చేసే విషయంలో మెరుగైన పనితీరు కనబరిచాయి. ప్రపంచ ఆరోగ్య సంస్థ సిఫార్సులను అనుసరిస్తూ సింగపూర్‌, వియత్నాం, శ్రీలంక ఇతర దేశాలకు విలువైన పాఠాలు నేర్పించాయి. ఇందులో కొన్ని భారత్‌కూ అనుసరణీయమే.
ఆదర్శప్రాయంగా సింగపూర్‌ విధానాలు
కొవిడ్‌ను తొలినాళ్లలోనే గుర్తించిన దేశాల్లో సింగపూర్‌ ఒకటి. మే-జూన్‌ నాటికి నిర్ధారిత కేసుల జాబితాను లెక్కతేల్చింది. గతంలో సార్స్‌ను ఎదుర్కొన్న అనుభవాన్ని ఉపయోగించుకుని కొవిడ్‌పై పోరుకు సంసిద్ధమైంది. పలు ప్రభుత్వ సంస్థలను రంగంలోకి దింపి, సమన్వయంతో ప్రణాళికాబద్ధంగా వ్యవహరించింది. ఆరోగ్య విభాగం, సింగపూర్‌ పోలీసు దళం కలసికట్టుగా పని చేశాయి. భౌతికదూరం, చేతులు కడుక్కోవడం, మాస్కులు ధరించడం వంటి అలవాట్లు పకడ్బందీగా అమలయ్యేలా అధికారులు జాగ్రత్తలు తీసుకున్నారు. ప్రతి ఒక్కరికీ పరీక్షలు నిర్వహించడం సాధ్యంకాని పరిస్థితుల్లో అత్యధిక ముప్పు ఉండే రోగులను సత్వరమే గుర్తించి, చికిత్స అందించడంపై దృష్టి పెట్టారు. వెయ్యిదాకా ప్రజారోగ్య క్లినిక్‌లను ఉపయోగించారు. ఇందులో ప్రభుత్వ, ప్రైవేటు భాగస్వామ్యం ఉంది. విదేశీ వలస కార్మికుల నుంచి పెద్ద ఎత్తున పాజిటివ్‌ కేసుల సమస్య ఎదురు కాగా, వేగంగా స్పందించి పరీక్షలు నిర్వహించి, క్వారంటైన్‌ కేంద్రాలకు తరలించారు. వైరస్‌ గొలుసు కట్టు వ్యాప్తిని అడ్డుకున్నారు.

వియత్నాం విజయం
కరోనాపై వియత్నాం జరిపిన పోరు ప్రపంచంలో అత్యంత విజయవంతమైనదిగా పేరొందింది. ప్రారంభదశలో ప్రధానమంత్రి ఆర్థిక పరమైన అంశాలకన్నా ఆరోగ్య పరిస్థితికే ప్రాధాన్యం ఇచ్చారు. మహమ్మారి నివారణ కోసం జాతీయ సారథ్య సంఘంతో కూడిన ప్రణాళికలను జారీ చేశారు. కరోనాపై పోరుకు పౌరులంతా ఏకం కావాలనే సందేశాన్ని బలంగా అందించారు. ప్రభుత్వంలోని వివిధ స్థాయుల్లో సంబంధిత వర్గాలన్నింటినీ సమన్వయ పరచడం కీలకంగా పని చేసింది. సైన్యం, పోలీసులు, క్షేత్రస్థాయి సంస్థల సహాయంతో వైరస్‌ను కట్టడి చేసే వ్యూహాల్ని అత్యంత వేగంగా అమలు చేశారు. విదేశాల నుంచి ప్రయాణికుల రాకను నిషేధించారు. ప్రపంచ ఆరోగ్య సంస్థ సిఫార్సుకు ముందే బహిరంగ ప్రదేశాలు, కార్యాలయాలు, నివాస భవనాల్లో మాస్కులు ధరించడాన్ని, శానిటైజర్లు ఉపయోగించడాన్ని నిక్కచ్చిగా అమలు చేశారు. హాట్‌స్పాట్‌ ప్రాంతాల్లో భారీస్థాయిలో క్వారంటైన్‌ సౌకర్యాలను అభివృద్ధి పరచారు. సామాజిక వ్యాప్తి జరగకుండా నిరోధించారు. సుమారు 4.50 లక్షల మందిని క్వారంటైన్‌ చేశారు. స్పష్టమైన ఆరోగ్య సందేశాల ద్వారా ప్రజల్ని ఎప్పటికప్పుడు అప్రమత్తం చేశారు. ఇలాంటి ప్రచార కార్యక్రమాలతో ప్రజల్లో విశ్వాసం పెరిగి, అందరూ జాగరూకులై తమవంతుగా జాగ్రత్తల్ని పాటించాలనే ప్రేరణను పొందారు.
శ్రీలంక సమర్థత
చిన్న ద్వీపదేశమైన శ్రీలంక కొవిడ్‌ మహమ్మారిని కట్టడి చేయడంలో సమర్థంగా వ్యవహరించింది. దేశవ్యాప్తంగా అందుబాటులో ఉండే ఆస్పత్రుల నెట్‌వర్క్‌, అత్యున్నత అర్హతలున్న వైద్య సిబ్బంది, ప్రజారోగ్య అధికారులతో కూడిన స్థానిక ప్రభుత్వాలతో శ్రీలంక ఆరోగ్య సంరక్షణ వ్యవస్థలు ఎంతో పేరొందాయి. అయితే, భారీ స్థాయిలో వైరస్‌ విరుచుకుపడితే నియంత్రించేందుకు అవసరమైన సంస్థాగత సామర్థ్యం లేకపోవడంతో ఆ బాధ్యతల్ని సైన్యం తలకెత్తుకుంది. క్వారంటైన్‌ కేంద్రాల పర్యవేక్షణ మొదలు కాంటాక్టుల్ని గుర్తించడం వరకు అన్ని పనులు చేపట్టింది. పోలీసులు నిషేధాజ్ఞల అమలు, ఉల్లంఘనులను గుర్తించి అరెస్టు చేయడం వంటి బాధ్యతలు నిర్వర్తించారు. విమానాల రద్దుతోపాటు, మార్కెట్లు, ప్రజారవాణా స్టేషన్లను శుభ్రం చేయడం వంటి చర్యల్ని కఠినంగా అమలు చేశారు. శ్వాసకోశ సంబంధ రుగ్మతలతో బాధపడే ఎలాంటి కేసులనైనా గుర్తించేలా వ్యవస్థలను సిద్ధం చేశారు. ప్రాథమిక ఆరోగ్య రంగ నెట్‌వర్క్‌ సేవల్ని పూర్తిస్థాయిలో ఉపయోగించుకున్నారు. ప్రజలకు ఇళ్ల వద్దకే పరీక్షలు, మందుల జారీని చేపట్టారు. కొవిడ్‌యేతర రోగులు సైతం సందేహాలను తీర్చుకునే సౌకర్యాలను ఏర్పాటు చేశారు. కొవిడ్‌పై పోరు ఓ క్రీడాపోటీలాంటిది. వ్యవస్థలన్నీ సమన్వయంతో ఒకేతాటిపై ముందుకు సాగితేనే ఈ తరహా మహమ్మారులపై విజయం సాధించడం తేలికవుతుంది. మన దేశంలోని రాష్ట్రాలు ఇలాంటి వ్యూహాత్మక విధానాల్ని అందిపుచ్చుకోవాల్సి ఉంది.

- డాక్టర్‌ ప్రియాబాలసుబ్రమణియం (భారత ప్రజారోగ్య ఫౌండేషన్‌లో సీనియర్‌ శాస్త్రవేత్త)

ఉప వ్యాఖ్యానం

ఎక్కువ మంది చదివినవి (Most Read)

దేవ‌తార్చ‌న

రుచులు

App