విశాఖ మన్యంలో అలజడి

ప్రధానాంశాలు

Updated : 18/10/2021 12:34 IST

విశాఖ మన్యంలో అలజడి

గంజాయి స్మగ్లర్లను తరలిస్తున్న పోలీసు వాహనంపై రాళ్ల దాడి

నల్గొండ పోలీసుల కాల్పులు

ఇద్దరు గిరిజనులకు తీవ్ర గాయాలు

నర్సీపట్నం గ్రామీణం, చింతపల్లి గ్రామీణం, న్యూస్‌టుడే: విశాఖ మన్యం నుంచి గంజాయి రవాణాదారులను తీసుకెళ్తున్న తెలంగాణ రాష్ట్రం నల్గొండ పోలీసులు ఆత్మరక్షణార్థం జరిపిన కాల్పుల్లో ఇద్దరు గిరిజనులు గాయపడ్డారు. దీనిపై స్థానికులు, చింతపల్లి పోలీసులు తెలిపిన వివరాల ప్రకారం... కొద్దిరోజుల క్రితం నల్గొండ జిల్లాలో శ్రీను అనే వ్యక్తి గంజాయితో అక్కడి పోలీసులకు పట్టుబడ్డాడు. అతడిచ్చిన సమాచారం ఆధారంగా ఈ కేసులో ఇతర నిందితులను గుర్తించేందుకు నల్గొండ టాస్క్‌ఫోర్స్‌ పోలీసులు శ్రీనుతో కలిసి చింతపల్లి మండలం అన్నవరం పంచాయతీ గాలిపాడు గ్రామానికి ఈ నెల 15న వచ్చారు. శనివారం మరోసారి వచ్చి గ్రామానికి చెందిన బాలకృష్ణ, లోవరాజులను అదుపులోకి తీసుకుని నర్సీపట్నంలో ఉంచారు. ఆదివారం మళ్లీ గాలిపాడు వెళ్లి, కిల్లో భీమరాజు అనే గిరిజనుడిని అదుపులోకి తీసుకున్నారు. నలుగురు నిందితులను వాహనం ఎక్కించుకుని నర్సీపట్నం వస్తున్నారు. గొర్రెల పెంపకంతో జీవిస్తున్న భీమరాజుకు గంజాయితో సంబంధం లేదని, పోలీసులతో మాట్లాడి అతన్ని విడిపించుకోవాలన్న ఉద్దేశంతో అన్నవరం సర్పంచి పాంగి సన్యాసిరావు, ఎంపీటీసీ సభ్యుడు కిల్లో వరహాలబాబు, మరో ఎనిమిది మంది కలిసి జీపులో పోలీసు వాహనాన్ని వెంబడించారు. తురబాల గెడ్డ సమీపంలో ట్రాఫిక్‌ జామ్‌ కావడంతో పోలీసు వాహనం ఆగింది. దీంతో వెనకే వచ్చిన గ్రామస్థులు కొందరు పోలీసు వాహనాన్ని చుట్టుముట్టారు. కొంతమంది పోలీసు వాహనంపై రాళ్లు రువ్వడంతో ఒక కారు అద్దాలు పగిలాయి. దీంతో ఆత్మరక్షణార్థం పోలీసులు కాల్పులు జరిపారు. ఈ సంఘటనలో గాలిపాడుకు చెందిన తండ్రీ కొడుకులైన కిల్ల్లో కామరాజు (55), కిల్ల్లో రాంబాబు (25) కాళ్లలోకి బుల్లెట్లు దిగాయి. వీరిని నర్సీపట్నం ప్రాంతీయ ఆసుపత్రికి తరలించారు. కాల్పులు జరిగిన స్థలాన్ని చింతపల్లి సీఐ శ్రీను, ఎస్సై మహ్మద్‌ ఆలీ పరిశీలించారు. చింతపల్లి సీఐ, అన్నవరం ఎస్సై నర్సీపట్నం ప్రాంతీయ ఆసుపత్రికి చేరుకుని క్షతగాత్రుల నుంచి వాంగ్మూలం తీసుకున్నారు. వారిని విశాఖపట్నం కేజీహెచ్‌కు తరలించారు.

ఆత్మరక్షణ కోసమే కాల్పులు: నల్గొండ ఎస్పీ
నల్గొండ నేరవిభాగం, న్యూస్‌టుడే: విశాఖ ఏజెన్సీలో జరిగిన కాల్పులపై నల్గొండ జిల్లా ఎస్పీ ఏవీ రంగనాథ్‌ స్పందించారు. ‘నాలుగు రోజులుగా అక్కడ గాలింపు జరుగుతోంది. ఆదివారం గంజాయి అమ్మకందారులను పట్టుకోవడానికి నకిరేకల్‌ సీఐ కె.నాగరాజు నేతృత్వంలోని బృందం గాలింపు చేపట్టింది. కొయ్యూరు మండలం తురబాల గెడ్డ ప్రాంతంలో నిందితులు ఉన్నట్లు తెలుసుకుని కూంబింగ్‌ ప్రారంభించారు. 30 మంది స్మగర్లు పోలీసు బృందాలపై రాళ్లదాడి చేయడంతో పోలీసులు కాల్పులు ప్రారంభించారు. మొదట గాలిలోకి, తర్వాత నిందితులపైకి కాల్పులు జరిపారు. కాల్పులలో ఇద్దరికి బుల్లెట్‌ గాయాలయ్యాయి’ అన్నారు. అక్కడి పోలీసులకు ముందుగా చెప్పాకే గాలింపు చేపట్టినట్లు ఆయన వివరించారు.




Advertisement

Tags :

మరిన్ని

జిల్లా వార్తలు
మరిన్ని

దేవతార్చన