Practice Papers: ప్రాక్టీస్‌ పేపర్లపై ఆ ప్రకటనలు నమ్మొద్దు.. విద్యార్థులకు CBSE అలర్ట్‌

దిల్లీ: సీబీఎస్‌ఈ 10, 12వ తరగతి పరీక్షలకు సంబంధించిన నమూనా పేపర్ల (sample papers) విషయంలో మోసాలు జరుగుతున్నాయని సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌ (CBSE) విద్యార్థులు, వారి తల్లిదండ్రులను హెచ్చరించింది. ప్రాక్టీస్‌ పేపర్ల (practice papers)ను అందించేందుకు తాము ఏ ప్రైవేటు పబ్లిషర్‌తో ఒప్పందం చేసుకోలేదని, వాటికి ఎలాంటి డబ్బులు చెల్లించాల్సిన అవసరం లేదని స్పష్టం చేసింది.

బోర్డు పరీక్షల నమూనా పత్రాల కోసం సీబీఎస్‌ఈ (CBSE).. ఎడ్యుకార్ట్‌ అనే సంస్థతో కలిసి పనిచేస్తోందని, కొంత మొత్తం వెచ్చించి ఆ ప్రాక్టీస్‌ పేపర్లను పొందొచ్చని కొన్ని మీడియాల్లో కథనాలు వచ్చాయి. ఈ నేపథ్యంలోనే సదరు కథనాలపై సీబీఎస్‌ఈ స్పందిస్తూ స్పష్టతనిచ్చింది.

‘‘జాతీయ విద్యా విధానం 2020 సిఫార్సుల ప్రకారం.. సీబీఐఎస్‌ తమ అనుబంధ స్కూళ్లలో Competency Focused Education and Assessment విధానాన్ని ప్రవేశపెట్టింది. ఈ క్రమంలోనే 10, 12వ తరగతుల్లోని ప్రధాన సబ్జెక్టులకు సంబంధించిన ప్రాక్టీస్‌ పేపర్లను ఇటీవల విడుదల చేశాం. విద్యార్థులు తమ నైపుణ్యాలను పెంచుకునేందుకు, టాపిక్స్‌ను సులువుగా అర్థం చేసుకునేందుకు ఈ పేపర్లు ఉపయోగపడుతాయి’’ అని సీబీఎస్ఈ తమ అడ్వైజరీలో పేర్కొంది.

ఆర్‌బీఐ పిలుస్తోంది..: అసిస్టెంట్‌ పోస్టుల భర్తీకి ప్రకటన

‘‘అయితే, కొన్ని ప్రైవేటు పబ్లిషర్ల సైట్ల నుంచి ఆ ప్రాక్టీస్‌ పేపర్లను యాక్సెస్‌ చేసుకోవచ్చని కొన్ని స్కూళ్లు, విద్యార్థులను ఆయా సంస్థలు కోరినట్లు బోర్డు దృష్టికి వచ్చింది. కానీ, మేం ఈ నమూనా పేపర్లను అందించడం కోసం ఏ ప్రైవేటు సంస్థతో ఒప్పందం చేసుకోలేదు. అలాంటి తప్పుడు ప్రకటనలు, ప్రమోషన్లను చూసి మోసపోవద్దు’’ అని సీబీఎస్‌ఈ స్పష్టం చేసింది.