CTET 2024: సీటెట్‌ (జనవరి)కు దరఖాస్తులు షురూ.. పరీక్ష డేట్‌ ఇదే..

CTET 2024 Applications| దిల్లీ: దేశవ్యాప్తంగా సీబీఎస్‌ఈ(CBSE) నిర్వహించే కేంద్రీయ ఉపాధ్యాయ అర్హత పరీక్ష (CTET Exam-jan 2024)కు నోటిఫికేషన్‌ విడుదలైంది. 18వ ఎడిషన్‌ సీటెట్‌ పరీక్షను 2024 జనవరి 21న (ఆదివారం) నిర్వహించనున్నట్లు సీబీఎస్‌ఈ వెల్లడించింది. దేశవ్యాప్తంగా 135 నగరాల్లో 20 భాషల్లో ఈ పరీక్ష జరగనుంది. CTET పరీక్షకు నవంబర్‌ 3 నుంచి 23వరకు ఆన్‌లైన్‌లో దరఖాస్తులు స్వీకరించనున్నారు. దరఖాస్తు రుసుంను నవంబర్ 23న రాత్రి 11.59గంటల వరకు చెల్లించవచ్చని సీబీఎస్‌ఈ ఓ ప్రకటనలో పేర్కొంది. దరఖాస్తు రుసుం జనరల్‌/ఓబీసీ అభ్యర్థులు ఒక పేపర్‌కు రూ.1000; రెండు పేపర్లకు రూ.1200; ఎస్సీ/ఎస్టీ/దివ్యాంగులైతే ఒక పేపర్‌కు రూ.500, రెండు పేపర్లకు రూ.600ల చొప్పున రుసుం చెల్లించాల్సి ఉంటుంది. ఈ పరీక్షలో సాధించిన స్కోరును కేంద్ర ప్రభుత్వ పరిధిలోని పాఠశాలల ఉపాధ్యాయ నియామకాల్లో పరిగణనలోకి తీసుకుంటారు. సీటెట్‌లో సాధించిన స్కోర్‌కు జీవిత కాల వ్యాలిడిటీ ఉంటుంది.

దరఖాస్తు కోసం క్లిక్‌ చేయండి

కొన్ని ముఖ్యమైన పాయింట్లు..

• సీటెట్‌ ఏటా రెండు సార్లు నిర్వహిస్తారు. ప్రస్తుతం 18వ ఎడిషన్‌ సీటెట్‌కు రిజిస్ట్రేషన్లు ప్రారంభమయ్యాయి.
• ఈ పరీక్ష మొత్తం రెండు పేపర్‌లను కలిగి ఉంటుంది. పేపర్-1ను​ ఒకటి నుంచి ఐదు తరగతులకు బోధించాలనుకునేవారు; పేపర్-2ను​ ఆరు నుంచి తొమ్మిదో తరగతులకు బోధించాలనుకునే వారు రాయొచ్చు.
• పేపర్-2 పరీక్ష ఉదయం 9.30 గంటల నుంచి మధ్యాహ్నం 12గంటల వరకు ఉంటుంది. పేపర్‌ -1 మధ్యాహ్నం 2 గంటల నుంచి సాయంత్రం 4.30గంటల వరకు
• తెలుగు రాష్ట్రాల్లో పరీక్ష కేంద్రాలివే.. గుంటూరు, తిరుపతి, విజయవాడ, విశాఖపట్నం, హైదరాబాద్, వరంగల్‌. పూర్తి సమాచారం కోసం క్లిక్‌ చేయండి