కమ్మటి నిద్రతో ఆయుష్షు!

దీర్ఘాయుష్షుతో, మంచి ఆరోగ్యంతో జీవించాలని అనుకుంటున్నారా? అయితే కంటి నిండా కమ్మగా నిద్ర పోయేలా చూసుకోండి. గాఢమైన నిద్ర గుండెకు.. మొత్తంగా ఆరోగ్యానికి మేలు చేస్తున్నట్టు, ఇది చివరికి ఎక్కువ కాలం జీవించటానికి తోడ్పడు తున్నట్టు అమెరికన్‌ కాలేజ్‌ ఆఫ్‌ కార్డియాలజీ వార్షిక సదస్సుకు సమర్పించిన పత్రం పేర్కొంటోంది. చిన్నవయసులో మంచి నిద్ర అలవాట్లు గలవారికి అకాల మరణం ముప్పు తక్కువగా ఉంటున్నట్టు ఇది చెబుతోంది. ఏ కారణంతోనైనా సంభవించే మరణాల్లో 8% వరకు సరిగా నిద్రపోక పోవటంతోనే ముడిపడి ఉంటుండటం గమనార్హం. మంచి ఆరోగ్యానికి తగినంత నిద్రపోయేలా చూసుకుంటే చాలనే విషయాన్ని ఈ అధ్యయన ఫలితాలు నొక్కి చెబుతున్నాయి.