విపణిలోకి ఎంజీ హెక్టార్‌ బ్లాక్‌స్టార్మ్‌

ధర రూ.21.24 లక్షల నుంచి 

ఈనాడు, హైదరాబాద్‌: ఎంజీ (మోరిస్‌ గ్యారేజెస్‌) మోటార్‌ సంస్థ, తమ హెక్టార్‌ మోడల్‌లో సరికొత్త బ్లాక్‌స్టార్మ్‌ ఎడిషన్‌ను తీసుకొచ్చింది. దేశంలో తొలి ఇంటర్నెట్‌ ఎస్‌యూవీ (స్పోర్ట్స్‌ వినియోగ వాహనం) ఇదని సంస్థ పేర్కొంది. నలుపు ఎక్స్‌టీరియర్స్‌, ఇంటీరియర్స్‌తో ఆకట్టుకునేలా తీసుకొచ్చిన ఈ వాహనం 5, 6, 7 సీట్ల సామర్థ్యంతో అందుబాటులో ఉంటుంది. ఈ ఎస్‌యూవీ రూ.21.24- 22.75 లక్షల (ఎక్స్‌-షోరూం) శ్రేణిలో లభిస్తుంది. ఎంజీ హెక్టార్‌ అమ్మకాలు మరింత పెరిగేందుకు బ్లాక్‌స్టార్మ్‌ దోహద పడుతుందని ఎంజీ మోటార్‌ ఇండియా చీఫ్‌ కమర్షియల్‌ ఆఫీసర్‌ సతీందర్‌ సింగ్‌ బాజ్వా తెలిపారు. శక్తిమంతమైన విలాసవంత - అధునాతన కార్లను అందించేందుకు తాము ముందుంటామని పేర్కొన్నారు. ఐ-స్మార్ట్‌ సాంకేతికతతో 75కి పైగా కనెక్టెడ్‌ ఫీచర్లు, 100 వాయిస్‌ కమాండ్లను వినియోగించే వీలు ఈ కారులో వీలుందన్నారు. తొలిసారిగా డిజిటల్‌ బ్లూటూత్‌ కీని అందిస్తున్నట్లు తెలిపారు.