అబ్బాయిలతో ఫోను మాట్లాడొద్దని మందలించినందుకు.. అన్నయ్య ప్రాణాలు తీసిన చెల్లి

రాజ్‌నంద్‌గావ్‌: అబ్బాయిలతో మొబైల్‌ ఫోన్‌లో మాట్లాడొద్దని మందలించాడన్న కోపంతో 14 ఏళ్ల బాలిక తన అన్నయ్య(18)ను గొడ్డలితో నరికి హత్య చేసింది. ఛత్తీస్‌గఢ్‌లోని ఖైరాగఢ్‌-ఛుయిఖదాన్‌-గండయి జిల్లాలోని అమ్లీదిఖాలా గ్రామంలో శుక్రవారం ఈ ఘటన చోటుచేసుకుంది. కుటుంబసభ్యులంతా కూలి పని కోసం బయటకు వెళ్లిన సమయంలో ఇంట్లో అన్నా, చెల్లి మాత్రమే ఉన్నారు. ఆ సమయంలో బాలిక మొబైల్‌ ఫోన్‌లో అబ్బాయిలతో చాలాసేపు మాట్లాడుతోంది. ఆ సంగతిని గమనించిన అన్నయ్య ఆమెను మందలించాడు. ఫోన్‌ ఉపయోగించొద్దని కోరాడు. దీంతో ఆగ్రహంతో రగిలిపోయిన బాలిక అన్నయ్య నిద్రలోకి జారుకున్న వెంటనే గొడ్డలితో గొంతు నరికింది. అనంతరం తన శరీరంపై పడిన రక్తపు మరకలు కడిగేసుకుంది. వస్త్రాలనూ శుభ్రం చేసుకుంది. ఆ తర్వాత ఏమీ తెలియనట్లు బయటకు వచ్చి ‘మా అన్నయ్యను ఎవరో హత్య చేశారు’ అని గ్రామస్థులకు తెలిపింది. పోలీసులు బాలికను గుచ్చిగుచ్చి ప్రశ్నించగా అసలు విషయం బయటపడింది.