Crime News: మాదకద్రవ్యాలకు బానిసై.. కుటుంబ సభ్యులను హతమార్చిన యువకుడు

రక్తపు మడుగులో నలుగురి మృతదేహాలు
దేశ రాజధానిలో దారుణం

దిల్లీ: మాదకద్రవ్యాలకు అలవాటుపడ్డ ఓ యువకుడు తన తల్లిదండ్రులతో పాటు, సోదరి, నాయనమ్మని హతమార్చాడు. దిల్లీలోని పాలం పోలీస్‌స్టేషన్‌ పరిధిలో ఈ ఘటన వెలుగు చూసింది. పోలీసులు తెలిపిన వివరాల ప్రకారం.. కేశవ్‌(25) మాదక ద్రవ్యాలకు బానిసై ఇటీవల ఒక రిహాబిలిటేషన్‌ కేంద్రంలో చికిత్స పొందాడు. అక్కడి నుంచి రాగానే మంగళవారం రాత్రి ఇంట్లో కుటుంబ సభ్యులతో ఘర్షణకు దిగాడు. ఈ క్రమంలో తన నాయనమ్మ దీవానాదేవి(75), తండ్రి దినేశ్‌(50), తల్లి దర్శన.. సోదరి ఊర్వశి(18)లను హతమార్చాడు. కేశవ్‌ దాడి చేస్తున్నప్పుడు ఆ ఇంట్లో అరుపులు విన్న చుట్టుపక్కల వాళ్లు పోలీసులకు సమాచారం ఇచ్చారు. పోలీసులు ఘటనాస్థలానికి వెళ్లి చూడగా నాలుగు మృతదేహాలు రక్తపు మడుగులో పడి ఉన్నాయి. బంధువులు, స్థానికులు నిందితుడిని పట్టుకొని పోలీసులకు అప్పగించారు. కేశవ్‌ తరచూ డబ్బు కోసం కుటుంబ సభ్యులను వేధించేవాడని.. మంగళవారం కూడా తల్లితో ఘర్షణ పడ్డాడని స్థానికులు తెలిపారు. కేశవ్‌ గతంలో ఏటీఎం చోరీ కేసులో జైలుకు కూడా వెళ్లి వచ్చాడు.