వైకాపా ప్రచారానికి వెళ్తున్న కారు ఢీకొని ముగ్గురికి తీవ్ర గాయాలు

గాయపడిన నాగమణి, అనురాధ

శెట్టూరు, న్యూస్‌టుడే: వైకాపా ప్రచారానికి వెళ్తున్న ఇన్నోవా కారు ద్విచక్ర వాహనాన్ని ఢీకొనడంతో ముగ్గురికి తీవ్ర గాయాలయ్యాయి. ఎస్సై రామ్‌భూపాల్‌ వివరాల మేరకు.. శెట్టూరు మండలం కనుకూరుకు చెందిన ఓబన్న, భార్య నాగమణి, కోడలు అనురాధ ద్విచక్ర వాహనంలో కళ్యాణదుర్గం వెళుతున్నారు. అదే సమయంలో శెట్టూరు మండలంలో వైకాపా ప్రచారానికి వస్తున్న ఇన్నోవా వీరి వాహనాన్ని ఢీకొంది. ప్రమాదంలో ముగ్గురికి తీవ్ర గాయాలు కాగా 108 వాహనంలో కళ్యాణదుర్గం ప్రభుత్వ ఆసుపత్రికి తరలించి ప్రథమ చికిత్స అందించారు. మెరుగైన వైద్యం కోసం అనంతపురం తీసుకెళ్లారు. బాధితుల ఫిర్యాదు మేరకు కేసు నమోదు చేసి విచారణ జరుపుతున్నట్లు ఎస్సై తెలిపారు.