తొర్రూరు ప్లాట్ల వేలంలో కాసుల పంట

ఈనాడు, హైదరాబాద్‌: హెచ్‌ఎండీఏ పరిధిలోని ప్లాట్ల అమ్మకం ద్వారా ప్రభుత్వానికి కాసుల పంట పండుతోంది. రంగారెడ్డి జిల్లా అబ్దుల్లాపూర్‌మెట్‌ మండలం తుర్కయాంజాల్‌ మున్సిపాలిటీ పరిధిలోని తొర్రూరులోని హెచ్‌ఎండీఏ లేఅవుట్‌లో ప్లాట్ల ఆన్‌లైన్‌ వేలం ద్వారా రెండు రోజుల్లో ప్రభుత్వానికి రూ.159.988 కోట్ల ఆదాయం సమకూరింది. తొలిరోజు ఆన్‌లైన్‌లో 41 ప్లాట్లు విక్రయించారు. రెండో రోజు శుక్రవారం కొనుగోలుదారుల నుంచి అనూహ్య స్పందన వచ్చింది. మరో 81 ప్లాట్లను ఆన్‌లైన్‌ వేలంలో విక్రయంచడం ద్వారా రూ.33.58 కోట్ల ఆదాయం వచ్చింది. అత్యధికంగా చదరపు గజానికి రూ.35,500 ధర పలకగా.. అత్యల్పంగా చదరపు గజానికి రూ.21 వేలకు వేలంలో కొనుగోలు చేశారు. మిగతా 106 ప్లాట్లను శని, సోమవారం ఆన్‌లైన్‌లో వేలం వేయనున్నట్లు హెచ్‌ఎండీఏ తెలిపింది.