పగలు భగభగలు.. రాత్రిపూట సెగలు

గురువారం రికార్డు స్థాయిలో 43.6 డిగ్రీలు..
ఈ సీజన్‌లో ఇదే అత్యధికం

ఈనాడు, హైదరాబాద్‌: మే నెల రాకతో ఎండలు మరింత ముదిరాయి. పగటిపూట భానుడి భగభగలతో ప్రజలు విలవిల్లాడిపోతున్నారు. ఉదయం నుంచే సూరీడు సుర్రుమనిపిస్తున్నాడు. సాయంత్రం 5 గంటల వరకు ఎండ తీవ్రంగానే ఉంటోంది. ఏడు గంటల వరకు వేడిగాలులు వీస్తున్నాయి. గురువారం నగరంలో పగటిపూట అత్యధిక ఉష్ణోగ్రత 43.6 డిగ్రీలు నమోదైంది. ఈసీజన్‌లో ఇదే అత్యధికం. గత పదేళ్లలో 2015లో 44.3 డిగ్రీలు ఇప్పటివరకు అత్యధికంగా ఉంది. ఈ వేసవి దీన్ని అధిగమించేలా ఉంది. రాత్రి పూట వేడి ఏమాత్రం తగ్గడం లేదు. కనిష్ఠ ఉష్ణోగ్రతలు 30 డిగ్రీల వరకు నమోదవుతున్నాయి. ఉక్కపోతతో జనం ఉడికిపోతున్నారు.