విషాదం నింపిన ఈత సరదా.. ఇద్దరు యువకుల మృతి

అనంతసాగరం, న్యూస్‌టుడే: యువకుల ఈత సరదా ఆ కుటుంబంలో విషాదం నింపింది. పెన్నా నదిలో ఈతకు వెళ్లిన ఐదుగురు యువకుల్లో ఇద్దరు మృతిచెందారు. మండలంలోని పాతాళపల్లి సమీపంలో మంగళవారం ఈ దుర్ఘటన చోటుచేసుకుంది. పాతాళపల్లికి చెందిన మిట్టమాల వంశీకృష్ణ(25), మిట్టమాల పెంచల నరసింహులు(23) నెల్లూరుకు చెందిన మరో ముగ్గురితో కలసి పెన్నానదిలో స్నానానికి వెళ్లాలని నిర్ణయించుకున్నారు. ఈ క్రమంలో ఉప్పలపాడు గ్రామం వద్ద వంతెన కింద పెన్నా నదిలో ఈతకు వెళ్లారు. ముందుగా ఈతరాని పెంచల నరసింహులు నదిలోకి దిగి ఒక్కసారిగా అందులో మునిగిపోయారు. గమనించిన అన్న వంశీకృష్ణ తమ్ముడిని కాపాడే క్రమంలో నదిలోకి దిగి తానూ గల్లంతయ్యారు. పక్కనే ఉన్న స్నేహితులు గమనించి వారిని కాపాడేందుకు ప్రయత్నించినా ఫలితం లేకుండా పోయింది. వారు చరవాణి ద్వారా తల్లిదండ్రులు, పోలీసులకు సమాచారం అందించారు. సంఘటనా స్థలానికి చేరుకున్న కుటుంబ సభ్యులు మృత్యువాత పడిన వంశీకృష్ణ మృతదేహాన్ని వెలికి తీశారు. గాలింపు అనంతరం నరసింహులు మృతదేహం బయటపడింది. ఆత్మకూరు సీఐ వేణు, ఎస్‌.ఐ.లు సుబ్బారావు, ముత్యాలరావు, అయ్యప్ప గజ ఈతగాళ్లతో శవాలను వెలికితీయించారు. మిట్టమాల చిన్న వెంకటయ్య, పెంచలమ్మ దంపతులకు ముగ్గురు కుమారుల్లో వంశీకృష్ణ, పెంచల నరసింహులు రెండు, మూడోవారు.