పుస్తకాలను ప్రేమించండి : ముఖ్యమంత్రి పిలుపు

చెన్నై, న్యూస్‌టుడే: పుస్తకాలు చదవాలని, ప్రేమించాలని ముఖ్యమంత్రి స్టాలిన్‌ పిలుపునిచ్చారు. ప్రపంచ పుస్తక దినోత్సవం సందర్భంగా ఆయన ఓ సందేశ ప్రకటన విడుదల చేశారు. అందులో... పుస్తకాలు అనేవి కొత్త ప్రపంచానికి కొలమానం, మేథో ఊట, విద్యకు పునాది, భావాలకు ప్రేరణ, మార్పునకు సాధనం అంటూ అభివర్ణించారు. అవి మానవ సమాజాన్ని వికసించేలా చేస్తాయని తెలిపారు. పుస్తకాలను చదవాలని, ప్రేమించాలని, ఇతరులకు కానుకగా ఇచ్చి పుస్తక పఠనాన్ని ప్రోత్సహించాలని పేర్కొన్నారు. ఇప్పటివరకు తనకు కానుకగా అందిన రెండున్నర లక్షలకు పైగా పుస్తకాలను పలువురు విద్యార్థులు, గ్రంథాలయాలకు విరాళంగా అందించినట్టు తెలిపారు.