జైపుర్‌: రాజస్థాన్‌లోని కాంగ్రెస్‌ ప్రభుత్వంపై కేంద్రమంత్రి, భాజపా అగ్రనేత రాజ్‌నాథ్‌ సింగ్‌ తీవ్రస్థాయిలో ధ్వజమెత్తారు. ఎన్నికల ప్రచారంలో పాల్గొన్న ఆయన..  అశోక్‌ గహ్లోత్‌ సర్కార్‌ ప్రశ్నపత్రాల లీకేజీలకు పాల్పడటం ద్వారా యువత భవిష్యత్తుతో ఆటలాడుతోందని మండిపడ్డారు. భాజపా అభ్యర్థులకు మద్దతుగా ఉదయ్‌పుర్‌ జిల్లాలోని ఖుర్వారా, జడోల్‌లలో ఆయన బుధవారం ప్రచారం నిర్వహించారు. రాజస్థాన్‌లో పరిస్థితులు బాగాలేవన్నారు. ఒక మహిళా ఎమ్మెల్యే తనకు రక్షణ లేదని భావిస్తున్నారంటే.. ఇక సామాన్య పౌరుల పరిస్థితి ఏంటి? అని ప్రభుత్వాన్ని ప్రశ్నించారు. రాష్ట్రంలో మహిళలపై అకృత్యాలు పెరగడంతో పాటు ప్రశ్నపత్రాలు లీక్‌ అవుతుండటం సిగ్గుచేటన్నారు. కాంగ్రెస్‌ హయాంలో కొత్త పరిశ్రమలు రాకపోగా ఉన్నవి మూతపడుతున్నాయని ఆరోపించారు. అభివృద్ధి కోసం అశోక్‌ గహ్లోత్‌ ప్రభుత్వం ఏమీ చేయడంలేదని.. ఒకవేళ ఏదైనా చేస్తే అది కుర్చీని కాపాడుకొనేందుకేనన్నారు. రాష్ట్రాన్ని అభివృద్ధి చేయడానికి బదులు.. వాళ్లలో వాళ్లే కొట్టుకుంటున్నారని రాజ్‌నాథ్‌ విమర్శించారు.