పార్టీ కార్యకర్తపై చేయి చేసుకున్న డీకే శివకుమార్‌!

బెంగళూరు: కర్ణాటక ఉప ముఖ్యమంత్రి డీకే శివకుమార్‌ పార్టీ కార్యకర్తపై చేయి చేసుకున్నారు. తన భుజంపై చేయి వేయడానికి ప్రయత్నించిన ఓ కార్యకర్త చెంప చెళ్లుమనిపించారు. హవేరీలో ఎన్నికల ప్రచారంలో ఈ ఘటన జరిగింది. ఈ వీడియో కాస్త వైరల్‌గా మారడంతో భాజపా డీకేపై విమర్శలు గుప్పించింది. 

కాంగ్రెస్‌ అభ్యర్థి వినోదా అసూతి తరఫున ప్రచారం చేసేందుకు డీకే శివకుమార్‌ కర్ణాటకలోని హవేరీకి వచ్చారు. కారు దిగగానే అదే పార్టీకి చెందిన ఓ స్థానిక నేత డీకే భుజంపై చేతులు వేయడానికి ప్రయత్నించారు. దీంతో కోపానికి గురైన ఆయన ఒక్కసారిగా కార్యకర్తపై చేయి చేసుకున్నారు.

వందల మంది ‘రేవణ్ణ’ బాధితులకు.. ప్రభుత్వం ఆర్థిక సహాయం!

ఈ వీడియోను భాజపా ఐటీ సెల్‌ హెడ్‌ అమిత్‌ మాల్వియా ‘ఎక్స్‌’లో పోస్ట్‌ చేసి శివకుమార్‌ ప్రవర్తనపై మండిపడ్డారు. ‘‘డీకే భుజంపై చేయి వేయడం ఆయన చేసిన నేరమా? కాంగ్రెస్‌ కార్యకర్తలు ఆ పార్టీ కోసం ఎందుకు పని చేయాలని అనుకుంటున్నారు?ఆ నాయకులు తిడతారు, కించపరుస్తారు, పోటీకి టికెట్లు మాత్రం ఇవ్వరు (కుటుంబ సభ్యులకే ఇస్తారు). అవినీతి సొమ్ము కోసమేనా? ఆత్మగౌరవం లేదా?’’ అంటూ ధ్వజమెత్తారు.