Medak: అర్ధరాత్రి ఆస్పత్రికి గర్భిణీ.. తాళం ఉండటంతో కటిక నేలపై ప్రసవం

మెదక్‌: అర్ధరాత్రి పురిటి నొప్పులతో ప్రభుత్వాస్పత్రికి వస్తే.. తాళం వేసి ఉండటంతో వరండాలోనే మహిళ ప్రసవించింది. కారు చీకట్లో కటిక నేలపై ప్రసవ వేదన పడుతూ ఆడబిడ్డకు జన్మనిచ్చింది. ఈ హృదయవిదారక ఘటన మెదక్‌ జిల్లా వెల్దుర్తిలో చోటుచేసుకుంది. బాధిత కుటుంబ సభ్యులు తెలిపిన వివరాల ప్రకారం..

వెల్దుర్తి గ్రామానికి చెందిన తాటి సృజన పురిటి నొప్పులతో ఆదివారం అర్ధరాత్రి 12 గంటల సమయంలో ఆస్పత్రికి వచ్చింది. డ్యూటీలో ఉండాల్సిన వైద్య సిబ్బంది అందుబాటులో లేరు. పైగా ఆస్పత్రికి తాళం వేసి ఉండడంతో ప్రసవ వేదన పడుతూ వరండాలోనే ఆడబిడ్డకు జన్మనిచ్చింది. సోమవారం మధ్యాహ్నం మూడు గంటల వరకు డాక్టర్‌ రాలేదని బాధితులు ఆగ్రహం వ్యక్తం చేశారు. ఈ విషయమై జిల్లా వైద్యాధికారి డా.చందు నాయక్‌ను వివరణ కోరగా.. రాత్రి సమయంలో విధులు నిర్వహిస్తున్న సిస్టర్‌ జయంతికి మెమో ఇచ్చామని, వైద్యుడిపైనా చర్యలు తీసుకుంటామని తెలిపారు.