Telangana News: నేడు బంద్‌ పాటించనున్న ఆటో, క్యాబ్‌, లారీ సంఘాలు

హైదరాబాద్‌: కొత్త మోటారు వాహనాల చట్టం అమలును నిలిపివేయాలని డిమాండ్‌ చేస్తూ ఆటోలు, క్యాబ్‌లు, లారీల డ్రైవర్ల సంఘాలు నేడు బంద్‌ పాటించనున్నాయి. ఒకరోజు పాటు బంద్‌ పాటించాలని డ్రైవర్ల సంఘాలు నిర్ణయం తీసుకున్నాయి. ఫిట్‌నెస్‌ పత్రాల ఆలస్యానికి జరిమానా విధించడంపై డ్రైవర్లు అభ్యంతరం వ్యక్తం చేస్తున్నారు. ఫిట్‌నెస్‌ పత్రాలు ఆలస్యంపై రవాణాశాఖ రోజుకు రూ.50 చొప్పున జరిమానా విధిస్తోంది. దీంతో జరిమానా రద్దుచేయాలని క్యాబ్‌, ఆటో, లారీ డ్రైవర్లు డిమాండ్‌ చేస్తున్నారు. డ్రైవర్ల సంఘాల పిలుపుమేరకు బుధవారం అర్ధరాత్రి నుంచి ఆటో, క్యాబ్‌, లారీ సర్వీస్‌లు ఆగిపోనున్నాయి. గురువారం ట్రాన్స్‌పోర్టు భవన్‌ ముట్టడికి డ్రైవర్ల ఐకాస పిలుపునిచ్చింది.