తెలుగు రాష్ట్రాల్లో సోదాలపై ఐటీశాఖ ప్రకటన

హైదరాబాద్‌: తెలుగు రాష్ట్రాలు, దిల్లీ, పుణె సహా 40 చోట్ల జరిపిన సోదాలపై ఆదాయపన్ను (ఐటీ)శాఖ ప్రకటన చేసింది. ఏపీ, తెలంగాణలో సుమారు రూ.2వేల కోట్ల విలువైన అవకతవకలు జరిగినట్లు గుర్తించామని ఆ ప్రకటనలో ఐటీ శాఖ పేర్కొంది. హైదరాబాద్‌, విజయవాడ, కడప, విశాఖపట్నం, దిల్లీ, పుణె నగరాల్లో దాడులు జరిపామని వెల్లడించింది. తెలుగు రాష్ట్రాల్లో జరిపిన సోదాల్లో కీలక పత్రాలు లభించాయిని.. మూడు ఇన్‌ఫ్రా కంపెనీల్లో నకిలీ బిల్లులను గుర్తించామని ఐటీ శాఖ ఆ ప్రకటనలో పేర్కొంది. లెక్క చూపని రూ.85లక్షల నగదు, రూ.71లక్షల విలువైన ఆభరణాలు తమ సోదాల్లో లభ్యమైందని తెలిపింది. ఓ ప్రముఖుడి మాజీ వ్యక్తిగత కార్యదర్శి నివాసంలోనూ తనిఖీలు జరిపామని ఐటీశాఖ వెల్లడించింది. బోగస్‌ సబ్ కాంట్రాక్టర్లు నకిలీ బిల్లులు ద్వారా భారీగా నగదు చలామణి చేస్తున్నట్లు గుర్తించామని ఐటీ శాఖ వివరించింది.