అమ్మ, నాన్న వాళ్ల అమ్మాయి

 కరోనా బాధితుల సేవలో వైద్యుల కుటుంబం

అమీర్‌పేట : కరోనా వ్యాధి.. ప్రపంచాన్ని గడగడలాడిస్తోంది. నివారణ ఔషధాలు లేని ఈ వ్యాధికి.. వైద్యులు కూడా ఎన్నో జాగ్రత్తలు తీసుకుని రోగులకు చికిత్సలు అందించాల్సిన పరిస్థితి. ఈ వాతావరణంలో ఓ కుటుంబంలోని ముగ్గురు వైద్యులూ కరోనా బాధితుల సేవలోనే తరిస్తుండడం విశేషం. హైదరాబాద్‌లోని ఛాతీ ఆసుపత్రి సూపరింటెండెంట్‌గా సేవలందిస్తున్నారు డా.మహబూబ్‌ఖాన్‌. శ్వాసకోశ వ్యాధుల నిపుణులైన ఖాన్‌.. ఛాతీ ఆసుపత్రిలో కరోనా రోగులకు చికిత్సలు అందిస్తున్నారు. ఇండోనేసియా దేశస్థులు 9 మంది ఈ వ్యాధి నుంచి కోలుకోవడంలో కీలక పాత్ర పోషించారు. ఆయన భార్య షహనాఖాన్‌ గాంధీ ఆసుపత్రిలో చర్మవ్యాధుల నిపుణురాలు. ఆమె అక్కడ కరోనా వార్డ్‌లోనే విధులు నిర్వహిస్తున్నారు. వీరి కుమార్తె రషిఖాఖాన్‌ హౌస్‌సర్జన్‌. ఫీవర్‌ ఆసుపత్రిలో విధులు నిర్వహిస్తున్న ఆమె.. కొవిడ్‌-19 రోగులు, అనుమానితుల నమూనాలు సేకరించడం తదితర విధుల్లో వైద్యులకు సహాయంగా పనిచేస్తున్నారు.