Anandh devarakonda: యాక్షన్‌ గణేశుడు వస్తున్నాడు

గతేడాది ‘బేబీ’ చిత్రంతో భారీ విజయాన్ని అందుకున్నారు ఆనంద్‌ దేవరకొండ. ఇప్పుడు ‘గం.. గం.. గణేశా’తో అలరించేందుకు సిద్ధమవుతున్నారు. ఆయన హీరోగా నటించిన ఈ సినిమాని ఉదయ్‌ శెట్టి తెరకెక్కించిన సంగతి తెలిసిందే. కేదార్‌ సెలగంశెట్టి, వంశీ కారుమంచి నిర్మించారు. ప్రగతి శ్రీవాస్తవ కథానాయిక. కరిష్మా, వెన్నెల కిశోర్‌ తదితరులు ముఖ్య పాత్రలు పోషించారు. ఈ సినిమా మే 31న ప్రేక్షకుల ముందుకు రానుంది. ఈ విషయాన్ని సోమవారం ప్రకటిస్తూ.. చిత్ర బృందం ఓ కొత్త పోస్టర్‌ను పంచుకుంది. ‘‘ఆనంద్‌కు ఇది తొలి యాక్షన్‌ చిత్రం. దీంట్లో చక్కటి ప్రేమకథకు చోటుంది. ఇది ఈ వేసవిలో అన్ని వర్గాల ప్రేక్షకుల్ని అలరించే చిత్రమవుతుంది’’ అని చిత్ర బృందం తెలిపింది. ఈ సినిమాకి చేతన్‌ భరద్వాజ్‌ సంగీతమందిస్తున్నారు. ఆదిత్య జవ్వాడి ఛాయాగ్రాహకుడిగా వ్యవహరించారు.

అల్లుడు హీరో.. ఆమిర్‌ నిర్మాత..

అగ్ర హీరో ఆమిర్‌ఖాన్‌ నిర్మాతగా.. ఆయన మేనల్లుడు ఇమ్రాన్‌ఖాన్‌ కథానాయకుడిగా ‘హ్యాపీ పటేల్‌’ అనే చిత్రం పట్టాలెక్కనుంది. ఈ సినిమాతో స్టాండప్‌ కమెడియన్‌, నటుడు వీర్‌దాస్‌ దర్శకుడిగా పరిచయం కానున్నారు. చాలా ఏళ్ల విరామం తర్వాత ఈ చిత్రంతో ఇమ్రాన్‌ఖాన్‌ తెరపై కనిపించనున్నారు. వినోదం ప్రధానంగా ఇది తెరకెక్కనుందని సోమవారం సన్నిహితవర్గాలు తెలిపాయి. షూటింగ్‌ ఇప్పటికే గోవాలో ప్రారంభమైనట్టు సమాచారం. ఇమ్రాన్‌ఖాన్‌ చివరిసారి కంగనా రనౌత్‌తో కలిసి ‘కట్టీ బట్టీ’ అనే చిత్రంలో కనిపించాడు.

ఉత్థాన పతనాల నడికర్‌

తెలుగు అగ్ర నిర్మాతలు నవీన్‌ యెర్నేని, వై రవిశంకర్‌లు మైత్రీ మూవీ మేకర్స్‌ పతాకంపై అలన్‌ ఆంటోనీ, అనూప్‌ వేణుగోపాల్‌లతో కలిసి నిర్మిస్తున్న చిత్రం ‘నడికర్‌’. ‘2018’ ఫేం టొవినో థామస్‌ ఇందులో కథానాయకుడు. లాల్‌ జూనియర్‌ తెరకెక్కిస్తున్నారు. మే 3న చిత్రం ప్రేక్షకుల ముందుకు వస్తున్న సందర్భంగా సోమవారం ట్రైలర్‌ని విడుదల చేశారు. ఇందులో ఆయన సినిమా సూపర్‌స్టార్‌ డేవిడ్‌ పడిక్కల్‌గా కనిపించారు. ఒకప్పుడు ఒక వెలుగు వెలిగిన అగ్ర తారగా నిలిచిన ఆయన..అనుకోని కొన్ని చిక్కుల్లో ఇరుక్కొని పాతాళానికి పడిపోయిన వైనం ఇందులో చూపించారు. ఈమధ్యలో పలికించిన భావోద్వేగాలు ఆకట్టుకునేలా ఉన్నాయి. భావన, సౌబిన్‌ సాహిర్‌, సురేశ్‌కృష్ణ ఇతర కీలక పాత్రలు పోషించారు.