ప్రజల కోసం మరిన్ని ఉద్యమాలు :కోదండరాం

హైదరాబాద్: ప్రజా సమస్యల పరిష్కారమే ధ్యేయంగా తెలంగాణ జనసమితి ఉద్యమిస్తోందని ఆ పార్టీ అధ్యక్షుడు కోదండరాం అన్నారు. తెజస రెండో ఆవిర్భావ దినోత్సవం సందర్భంగా పార్టీ జెండాను ఆయన ఆవిష్కరించారు. ఈ సందర్భంగా కోదండరాం మాట్లాడుతూ.. పార్టీ ఆవిర్భవించిన రెండేళ్ల కాలంలో ప్రజల పక్షాన నిలబడి అనేక ఉద్యమాలు చేసినట్లు చెప్పారు. భవిష్యత్తులో నిరుద్యోగం, విద్య, వైద్యం, వ్యవసాయ రంగాల సమస్యలపై ఉద్యమిస్తూ పార్టీని బలోపేతం చేస్తామని స్పష్టం చేశారు. అకాల వర్షాలతో తడిసిన ధాన్యాన్ని కొనుగోలు చేసి రైతులను ఆదుకోవాలని ఈ సందర్భంగా ప్రభుత్వాన్ని ఆయన డిమాండ్‌ చేశారు. రాష్ట్రంలో ధాన్యం కొనుగోళ్లు సక్రమంగా జరగడం లేదని మండిపడ్డారు. తాలు పేరుతో కోత విధించడం సరి కాదన్నారు. అనంతరం పారిశుద్ధ్య కార్మికులకు నిత్యావసర సరకులను పంపిణీ చేశారు. పలువురు తెజసా  నాయకులు సామాజికదూరం పాటిస్తూ కార్యక్రమంలో పాల్గొన్నారు.