Andhra News: రాష్ట్రపతి అభ్యర్థిగా తెలుగు వారుంటే సంతోషించేవాళ్లం: జీవీఎల్‌ నరసింహారావు

ఈనాడు, దిల్లీ: రాష్ట్రపతి అభ్యర్థిగా తెలుగు రాష్ట్రాల వారు ఉంటే ఎంతో సంతోషించే వాళ్లమనడంలో ఎటువంటి సందేహం లేదని భాజపా రాజ్యసభ సభ్యుడు జీవీఎల్‌ నరసింహారావు అన్నారు. రాష్ట్రపతి అభ్యర్థి ఎంపికపై దేశవ్యాప్తంగా ఇంత సానుకూల వాతావరణం నెలకొనడం గత మూడు దశాబ్ధాల్లో తానెప్పుడూ చూడలేదన్నారు. దిల్లీలోని తన నివాసంలో శుక్రవారం ఆయన విలేకరులతో మాట్లాడారు. ‘ ఆదివాసీ మహిళ, కౌన్సిలర్‌గా, ఎమ్మెల్యేగా, రాష్ట్ర మంత్రిగా, గవర్నర్‌గా అన్ని విధాలా సుశిక్షితురాలైన ద్రౌపది ముర్మును రాష్ట్రపతి అభ్యర్థిగా ఎంపిక చేయడంతో పండగ వాతావరణం నెలకొంది. దేశానికి వన్నె తెచ్చే ఓ గొప్ప మహిళ ఆమె. ప్రతిపక్షాలు సైతం మద్దతు ఇస్తున్నాయి...’ అని జీవీఎల్‌ పేర్కొన్నారు. ఆమెపై రాంగోపాల్‌ వర్మ చేసిన ట్వీట్‌ ఉపసంహరించుకోవాలన్నారు. దేశ సమగ్రతను, ఐక్యతను ఎవరూ ప్రశ్నించలేరని, దెబ్బతీయలేరన్నారు.