YSRCP: కర్నూల్లోనూ అదే పరిస్థితి.. ‘మమ’ అనిపించిన మంత్రులు

కర్నూలు: ‘సామాజిక న్యాయభేరి’ బస్సు యాత్రలో భాగంగా వైకాపా మంత్రులు నిర్వహిస్తోన్న సభలకు స్పందన అంతంతమాత్రంగానే ఉంటోంది. జనాలు లేకపోవడంతో సభలు వెలవెలబోతున్నాయి. కర్నూలులోని సీ క్యాంపు వద్ద ఆదివారం నిర్వహించిన సభకు ప్రజలెవరూ లేకపోవడంతో మంత్రులు తూతూ మంత్రంగా సభ నిర్వహించి వెళ్లారు. 

ఉదయం 9 గంటలకే డ్వాక్రా మహిళలను సభా వేదిక వద్దకు అధికారులు తరలించారు. కనీసం షామియానాలు కూడా లేకపోవడంతో ఎండ తీవ్రత తట్టుకోలేక మహిళలు వెనుదిరిగారు. మంత్రులు ఒంటిగంటకు కర్నూలు చేరుకోగా.. అప్పటికే ప్రజలంతా వెళ్లిపోవడంతో సభ బోసిపోయింది. కుర్చీల్లో కూర్చోవాలంటూ కర్నూలు మేయర్‌ బీవై రామయ్య, ఎమ్మెల్యే హఫీజ్‌ఖాన్‌ ఎంత మొత్తుకున్నా ఎవరూ రాలేదు. దీంతో మంత్రులు సభను ‘మమ’ అనిపించి వెళ్లిపోయారు. ఈ సందర్భంగా మంత్రులు మాట్లాడుతూ మరో 30 ఏళ్లు రాష్ట్రంలో వైకాపాయే అధికారంలో ఉంటుందని ధీమా వ్యక్తం చేశారు. సీఎం జగన్‌ సారథ్యంలోనే సామాజిక న్యాయం జరుగుతోందని చెప్పారు.