Covid Vaccine: టీకా వద్దనడానికి బాల్యపు గాయాలే కారణం

 తాజా అధ్యయనంలో విశ్లేషణ

లండన్‌: కొవిడ్‌ టీకా సురక్షితమని... కరోనా సోకినా, తీవ్రస్థాయి ముప్పు వాటిల్లకుండా కాపాడుతుందని నిపుణులు ఎంత చెబుతున్నా, కొంతమంది వ్యాక్సిన్‌ తీసుకోవడానికి ససేమిరా అంటున్నారు. వారు అలా అనడానికి కారణాలేంటన్నది బాంగోర్‌ యూనివర్సిటీ శాస్త్రవేత్తలు తాజాగా విశ్లేషించారు. చిన్నతనంలో వివిధ రకాలుగా బాధలకు గురికావడంవల్లే చాలామంది టీకా తీసుకోవడానికి సందేహించడం లేదా నిరాకరించడం చేస్తున్నట్టు వారు గుర్తించారు. పబ్లిక్‌ హెల్త్‌ వేల్స్, లైవ్‌పూల్‌ హోప్‌ యూనివర్సిటీ శాస్త్రవేత్తలు ఈ అధ్యయనం సాగించారు. టీకా తీసుకోవడానికి అర్హత ఉండి కూడా దాన్ని తీసుకోవడానికి ముందుకురాని 6,763 మందిని ప్రశ్నించారు. 18 ఏళ్లు నిండకముందు శారీరకంగా, మానసికంగా, లైంగికంగా, మాటల ద్వారా వేధింపులకు గురయ్యారా? తల్లిదండ్రులు తరచూ గొడవ పడేవారా? వారు విడిపోయారా? మద్యం, మత్తు పదార్థాలు తీసుకునే అలవాటుందా? మానసిక అనారోగ్యంతో బాధపడే కుటుంబ సభ్యులతో కలిసి ఎప్పుడైనా జీవించారా? దీర్ఘకాలిక శారీరక రుగ్మతలేమైనా ఉన్నాయా? అన్న వివరాలు సేకరించి విశ్లేషించారు.