భారత రాష్ట్ర సమితి ఐదు ముక్కలవ్వడం ఖాయం: మంత్రి కోమటిరెడ్డి

భువనగిరి అర్బన్, న్యూస్‌టుడే: భారత రాష్ట్ర సమితి ఐదు ముక్కలు కావడం ఖాయమని రాష్ట్ర ఆర్‌అండ్‌బీ శాఖ మంత్రి కోమటిరెడ్డి వెంకట్‌రెడ్డి జోస్యం చెప్పారు. సోమవారం యాదాద్రి భువనగిరి కలెక్టరేట్‌లో ఆయన విలేకరులతో మాట్లాడుతూ... ‘‘తెరాస నుంచి భారత రాష్ట్ర సమితిగా రూపాంతరం చెందినప్పుడే ఆ పార్టీ పనైపోయింది. త్వరలో ఐదు ముక్కలవుతుంది. అందులో భారత రాష్ట్ర సమితి పెన్షనర్ల సంఘం అధ్యక్షుడిగా కేసీఆర్‌ వ్యవహరిస్తారు. కేటీఆర్‌ భారత రాష్ట్ర సమితి, హరీశ్‌రావు భారత రాష్ట్ర సమితి(హెచ్‌), సంతోశ్‌రావు భారత రాష్ట్ర సమితి(ఎస్‌), భారత రాష్ట్ర సమితి హిమాన్షుగా పార్టీ విడిపోతుంది. కవిత మాత్రం ఏం చేస్తారో నాకు తెలియదు. అయిదేళ్లు ఎంపీగా ఉండి ప్రజలకు ఏమీ చేయని కవిత ఇప్పుడు జనంబాట పేరుతో ఏం సాధిస్తారు’’ అని ప్రశ్నించారు. మంత్రి వెంట ప్రభుత్వ విప్, ఆలేరు శాసనసభ్యుడు బీర్ల అయిలయ్య, ఎంపీ చామల కిరణ్‌కుమార్‌రెడ్డి ఉన్నారు.