చిన్న పరిశ్రమలకు చేయూత

 తెలంగాణ సర్కారుతో సిడ్బి ఒప్పందం

ఈనాడు, హైదరాబాద్‌: సూక్ష్మ, చిన్న, మధ్యతరహా పరిశ్రమలకు చేయూతనిచ్చేందుకు తెలంగాణ ప్రభుత్వంతో చిన్న పరిశ్రమల అభివృద్ధి బ్యాంకు(సిడ్బి) అవగాహన ఒప్పందం కుదుర్చుకుంది.  ఒప్పంద పత్రాలపై రాష్ట్ర పరిశ్రమల శాఖ సంచాలకుడు కృష్ణభాస్కర్‌, బ్యాంకు ఉప మేనేజింగు డైరెక్టర్‌ వీఎస్‌ వెంకటరావులు సంతకాలు చేశారు. ఈ సందర్భంగా కృష్ణభాస్కర్‌ మాట్లాడుతూ.. చిన్న పరిశ్రమలను ఆదుకునేందుకు ప్రభుత్వం కృషి చేస్తోందన్నారు. సిడ్బి సహకారంతో పర్యావరణ వ్యవస్థను బలోపేతం చేస్తామని తెలిపారు. వెంకటరావు మాట్లాడుతూ.. తమ బ్యాంకు ప్రాజెక్టు మేనేజ్‌మెంట్‌ యూనిట్‌ ద్వారా చిన్న పరిశ్రమలకు ఈక్విటీ మద్దతు, వడ్డీ రాయితీ, సంక్షోభంలో ఉన్న, అవసరమైన వాటికి సాయం అందిస్తామన్నారు.