వినువీధిలో.. విశ్వవిజేతలు!

12.4 మొత్తం పైలట్లలో మహిళల శాతం
8737 మనదేశంలో మొత్తం పైలట్ల సంఖ్య
1092 మహిళా పైలట్లు

మనమ్మాయి ఏం చేయాలనుకుంటోంది...
ఇంజినీర్‌, డాక్టర్‌...
ఇవన్నీ రొటీన్‌ అయిపోయాయండీ...
ఇప్పుడు అమ్మాయిల ఆకాంక్షలు ఆకాశమే హద్దుగా ఉన్నాయి.  ఉండడమేంటి...
వాటిని సాధించేస్తున్నారు కూడా!
అవును.. ప్రపంచంలోని అభివృద్ధి చెందిన దేశాలతో పోలిస్తే మనదేశంలో మహిళా పైలట్ల సంఖ్య ఎక్కువ.. ఈ విజయం వెనుక మనలో స్ఫూర్తిని నింపే అనేక విషయాలున్నాయి..

అది కదన రంగంలో నిప్పులు కురిపించే యుద్ధ విమానం కావొచ్చు. ప్రయాణీకులని సురక్షితంగా గమ్యానికి చేర్చే కమర్షియల్‌ విమానం కావొచ్చు. వాటిని అత్యంత చాకచక్యంగా నడిపించి శెభాష్‌ అనిపించుకుంటున్నారు అమ్మాయిలు. గత ఏడాది శివాంగీలాంటి వాళ్లు యుద్ధ విమానాలు నడిపించి భేష్‌ అనిపించుకుంటే నిన్నటికి నిన్న 17 వేల కిలోమీటర్ల దూరాన్ని ఉత్తర ధ్రువంమీదుగా అవలీలగా నడిపేసి ఔరా అనిపించుకుంది ఆల్‌విమెన్‌టీం. పైలట్లుగా అమ్మాయిలు తిరగరాస్తున్న విజయాల్లో ఇవి కొన్ని ఉదాహరణలు మాత్రమే.. ఇతర రంగాలతో పోల్చుకుంటే విమానయాన రంగం సున్నితమైంది, సంక్లిష్టమైందీ కూడా. అపారమైన సాంకేతిక పరిజ్ఞానంతోపాటూ వాతావరణ పరిస్థితులకు ఎదురీదే మనోధైర్యం కూడా ఉండాలి. వీటన్నిటికీ మేం సిద్ధం అంటున్నారు అమ్మాయిలు. అందుకే తమ కెరీర్‌గా విమానయాన రంగాన్ని ఎంచుకుంటున్న వారి సంఖ్య గణనీయంగా పెరుగుతోందని అంటున్నారు నిపుణులు. ముఖ్యంగా 2017 తర్వాత దేశంలో వివిధ విమానయాన సంస్థల్లో పనిచేస్తున్న మహిళా పైలట్ల సంఖ్య రెట్టింపైంది. ఆ ఏడాది మహిళాపైలట్లకు కల్పిస్తున్న సౌకర్యాలను పెంచుతూ ప్రభుత్వం చేసిన చట్టమే ఇందుకు కారణమైంది. మహిళా పైలట్లకు ఇచ్చే మాతృత్వ సెలవులు 12 నుంచి 26 వారాలకు పెంచారు. అలాగే వారు గర్భిణులుగా ఉన్నప్పుడు పైలట్‌ పనికి విరామం ఇచ్చి కాస్త వెసులుబాటు ఉండే ఆఫీసు విధుల్లో ఉండొచ్చు. తక్కిన రంగాల్లో మాదిరిగా జీతాల విషయాల్లో ఉన్న లింగవివక్ష ఇక్కడ లేకపోవడం కూడా ఈ రంగంలో మహిళలు రాణించడానికి కారణమవుతోంది. పురుషులతో సమానమైన వేతనాల్ని ఇక్కడ అందుకుంటున్నారు. అలాగే విధులు పూర్తయ్యాక వారి భద్రత విషయంలో కూడా విమానయాన సంస్థలు ప్రత్యేక శ్రద్ధ తీసుకుంటున్నాయి. దాంతో ఎలాంటి జంకూ లేకుండా ఈ రంగంలో అమ్మాయిలు అడుగుపెడుతున్నారు. మనదేశంలో ఏటా సగటున 22 శాతం విమానయాన రంగం విస్తరిస్తోంది. స్పైస్‌జెట్‌, ఇండిగో లాంటి సంస్థలు అనేక మంది మహిళా పైలట్లను కోరిమరీ ఎంపిక చేసుకుంటున్నాయి. రాబోయే మూడేళ్లలో తమ మొత్తం పైలట్లలో మూడోవంతు మహిళలే ఉండేలా ప్రణాళికలు రూపొందించుకున్నాయి.

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

మరిన్ని

రుచులు

App