వారితో అమ్మా అని పిలిపిస్తా!
close
Updated : 23/06/2021 05:46 IST
Facebook Share Twitter Share WhatsApp Share Telegram Share Link Share

వారితో అమ్మా అని పిలిపిస్తా!

వినికిడి లోపం ఉన్న చిన్నారులు..  ఆ సమస్యని అధిగమించి మిగిలిన పిల్లలతో అన్నింటా పోటీపడేలా తీర్చిదిద్దుతున్నారు డాక్టర్‌ వడ్డాది ఆనంద జ్యోతి. ఈ రంగంలో 29 ఏళ్ల కృషి ఆవిడది. అంతర్జాతీయంగా విద్యారంగంలో చేంజ్‌మేకర్స్‌కి ఏటా అందించే ‘వన్‌మిలియన్‌ వన్‌బిలియన్‌ లీడ్‌ జెడ్‌ టీచర్‌’ అవార్డుకు ఆవిడ నామినేట్‌ అయ్యారు.. ఈ సందర్భంగా వసుంధరతో తన ప్రస్థానాన్ని పంచుకున్నారు...

రాజమండ్రి నుంచి నా దగ్గరకు సింధుని తీసుకొచ్చినప్పుడు తనకు మూడేళ్లు. నేను మూడేళ్లు శిక్షణనిచ్చా. ప్రతి పదాన్నీ పలకడం, రాయడం, చిన్నచిన్న లెక్కలు నేర్పించా. హైదరాబాద్‌లోని ఒక ఎయిడెడ్‌ స్కూల్లో తనను చేర్చుకోవడానికి నిరాకరిస్తే వాళ్లతో మాట్లాడి చేర్పించాను. సింధు బాగా చదువుకుని సాఫ్ట్‌వేర్‌ ఇంజినీర్‌ అయింది. పెళ్లి చేసుకుంది. అలాగే గౌరిశ్రీప్రియ. విజయవాడ నుంచి వాళ్లమ్మగారు నాదగ్గరకు తీసుకొచ్చేసరికి అమ్మా, నాన్న అనడం కూడా రాదు. అటువంటి చిన్నారికి నేనిచ్చిన శిక్షణ ఉపయోగపడింది. ఇప్పుడు తను డిగ్రీ పాసైయ్యింది. ఇలా దాదాపు 700 మందికిపైగా శిక్షణనిచ్చాను. చూస్తుండగానే ఏళ్లు గడిచిపోయాయి.

మాది మధ్యతరగతి కుటుంబం. నాన్న అనారోగ్యంతో కన్నుమూసిన వారానికి పుట్టా. అమ్మ నన్ను తీసుకుని విశాఖ నుంచి హైదరాబాద్‌లోని అమ్మమ్మ దగ్గరకు వచ్చేసింది. డాక్టరు కావాలని కలలు కనేదాన్ని. ఆర్థిక ఇబ్బందుల వల్ల సాధ్యం కాలేదు. ఇంటర్‌ అవ్వగానే నా పెళ్లైంది. రెండేళ్లలో ఇద్దరు మగపిల్లలు. ఖాళీగా ఎందుకని ఓ స్కూల్లో రూ.150 జీతానికి టీచర్‌గా చేరా. ప్రైవేట్లు కూడా చెప్పే దాన్ని. ఓపెన్‌ యూనివర్సిటీలో డిగ్రీలో చేరా. తర్వాత టీచర్‌ శిక్షణ ప్రవేశపరీక్ష రాస్తే మొదటి ర్యాంకు వచ్చింది. అదే ఏడాది కేంద్ర ప్రభుత్వం వినికిడి లోపం ఉన్న పిల్లల బోధన కోసం ఓ ఇన్‌స్టిట్యూట్‌ ప్రారంభిస్తున్నట్లు తెలిసింది. దీనిపై ఆసక్తి కలిగింది. ఇదీ వైద్యమే కదా అనుకున్నా. సికింద్రాబాద్‌లోని అలీ యావర్‌ జంగ్‌ నేషనల్‌ ఇన్‌స్టిట్యూట్‌ ఫర్‌ ది హియరింగ్‌ హ్యాండీకాప్డ్‌ (ఏవైజేఎన్‌ఐహెచ్‌హెచ్‌)లో ఏడాది కోర్సు చేశాను. అది నా జీవితాన్ని మలుపు తిప్పింది. ఆ కోర్సు అయ్యాక ఓ డాక్టరు వద్ద మూడేళ్లు పనిచేశా. ఆ క్లినిక్‌కు వచ్చే పిల్లలకు స్పీచ్‌ థెరపీ చేసేదాన్ని. పంజాగుట్టలోని పాక్షిక వినికిడి లోపం ఉన్న పిల్లల కోసం ప్రభుత్వ పాఠశాల ఉండేది. అందులో ఓ ఏడాది పని చేశా. అంతలో అలీ యావర్‌ జంగ్‌ ఇన్‌స్టిట్యూట్‌ నుంచే టీచర్‌గా చేరమంటూ పిలుపొచ్చింది. 1992 నుంచి 29 ఏళ్లుగా అక్కడే సేవలందిస్తున్నా.

రెండేళ్ల శిక్షణతో...

వినికిడి శక్తిలేని చిన్నారులను మా ఇన్‌స్టిట్యూట్‌కు తీసుకొస్తే క్లినికల్‌ టెస్ట్‌లు నిర్వహిస్తాం. ఈ సమస్య ఉన్న మూడేళ్ల వయసు లోపు పిల్లలకు శిక్షణనివ్వడం నా బాధ్యత. ఈ శిక్షణలో తల్లి పాత్ర కూడా కీలకం. పిల్లల నిత్యావసరాలు తీర్చడం నుంచి ఆహారం అందించే వరకు ప్రతి పదం వారితో తల్లి చెబుతూనే ఉండాలి. ఈ దిశగా పిల్లలకూ, తల్లులకూ శిక్షణ ఇస్తా. ఈ శిక్షణ తీసుకున్న పిల్లలు ఏడాదికే 300 పదాలు గుర్తించి, తిరిగి చెప్పడమే కాదు, ఆయా వస్తువులను బొమ్మలతో మ్యాచ్‌ కూడా చేయగలుగుతారు. రెండో ఏడాది శిక్షణలో వారాలు, నెలలపేర్లు... చెప్పడం, రాయడం, వాక్య నిర్మాణం, అంకెలను నేర్చుకుని ఎక్కాలతో చిన్నచిన్న లెక్కలు చేయడం, రంగులు గుర్తించడం, బొమ్మలు వేయడం, కథలు చదవడం, చెప్పడం వంటి అంశాల్లో తర్ఫీదు పొందుతారు. పాఠశాలలో సాధారణ పిల్లలతోపాటు కలిసిపోయేలా శిక్షణ అందుతుంది. ఇతరులు ఏం మాట్లాడుతున్నారో మెషిన్‌తో వింటూ స్పందించేలా తీర్చిదిద్దుతాం. ఈ తరహా ప్రాథమిక శిక్షణ ఆ పిల్లలు ఆత్మవిశ్వాసంతో ముందుకు సాగేలా చేస్తుంది.

ప్రత్యేక సిలబస్‌తో...

ఉద్యోగం చేస్తూనే బీఎస్సీ, బీఈడీ చదివి ఎడ్యుకేషనల్‌ కౌన్సెలింగ్‌లో పీహెచ్‌డీ చేశా. దేశం మొత్తం తిరిగి... సాధారణ పిల్లలు, వినికిడి శక్తిలేని పిల్లల సామర్థ్యాల మధ్య తేడాలను గుర్తించాను. ఈ పిల్లల కోసం ప్రత్యేకంగా సిలబస్‌ను తయారుచేశా. ఇప్పుడీ సిలబస్‌నే దేశవ్యాప్తంగా మా ఇన్‌స్టిట్యూట్‌ శాఖలన్నింటిలోనూ అనుసరిస్తున్నారు.

ముందే గుర్తిస్తే మేలు...

నిర్లక్ష్యం వల్ల కొంత, అవగాహన లేకపోవడం వల్ల కొంత చాలామంది అమ్మానాన్నలు పిల్లల్లోని లోపాలను గుర్తించడంలో ఆలస్యం చేస్తుంటారు. రెండేళ్లలోపు గుర్తిస్తే ఈ లోపాన్ని సరిదిద్దుకోవచ్చు. ఒక వేళ ఆలస్యంగా వచ్చినా క్లినికల్‌ టెస్ట్‌లు నిర్వహించి వయసు బట్టి ప్రభుత్వపథకాల ద్వారా శిక్షణకు పంపిస్తున్నాం. సమగ్రశిక్షా అభియాన్‌ పేరుతో ప్రతి మండలంలోనూ ఈ తరహా సమస్య ఉన్న చిన్నారులకు విద్యనందిస్తున్నారు. 18 ఏళ్లు దాటినవారిని మాత్రం ఐటీఐ ట్రైనింగ్‌కు ప్రోత్సహిస్తున్నాం. నా దగ్గర శిక్షణ పొందిన పిల్లలు, వాళ్ల అమ్మానాన్నలు ఫోన్లు చేసి విశేషాలు చెబుతూ ఉంటే సంతోషంగా ఉంటుంది. ఈ జీవితానికి ఇంకేం కావాలనిపిస్తుంది.


మంచిమాట

మహిళలు భయం లేకుండా ఉండాలనేది సరికాదు. ఉన్న భయాలను అధిగమించాలి.

- ఎమ్మా వాట్సన్‌, ఆంగ్ల నటి


మరిన్ని

ఇంటి పేరుతో కాదు... ఇది నా స్వయంకృషి...!

నాన్న ప్రముఖ నటుడు దగ్గుబాటి వెంకటేశ్‌. ఇక తాత, పెదనాన్న, అన్న... ఇలా ఆ ఇంట్లో వాళ్ల పేర్లు చెప్పక్కర్లేదు. వారి పేర్లు ఉపయోగించుకుంటే బోలెడు గుర్తింపు. కానీ ఆమె మాత్రం... తన అభిరుచి, సృజనాత్మకత, శ్రమలనే పెట్టుబడిగా గుర్తింపు సాధించాలనుకుంది. తనే వెంకటేశ్‌ పెద్ద కుమార్తె ఆశ్రిత. తన లక్ష్యం దిశగా కృషి చేస్తూ... ఇన్‌స్టాగ్రాం, యూట్యూబ్‌ల్లో లక్షల్లో అభిమానుల్ని సంపాదించుకుంది. ఇటీవల ఇన్‌స్టాగ్రాంలో ఎక్కువ సంపాదిస్తున్న సెలబ్రిటీల జాబితాను హోపర్‌డాట్‌కాం సంస్థ విడుదల చేసింది. అందులో ఆశ్రిత అంతర్జాతీయంగా 377, ఆసియాలో 27వ ర్యాంకులు సాధించింది. ఈ సందర్భంగా వసుంధర ఆమెతో ముచ్చటించింది.

‘స్పెల్లింగ్స్‌’ చెప్పి సెన్సేషనయ్యారు!

పిల్లల్లో ఇంగ్లిష్‌ నైపుణ్యాలను పరీక్షించడానికి అమెరికాలో ఏటా నేషనల్‌ స్పెల్లింగ్‌-బీ పోటీలు నిర్వహిస్తోన్న సంగతి తెలిసిందే. ఎంతో ప్రతిష్ఠాత్మకంగా జరిగే ఈ పోటీల్లో వేలాదిమంది చిన్నారులు పాల్గొంటారు. తల్లిదండ్రులు కూడా తమ పిల్లలను ఈ పోటీలకు అన్ని రకాలుగా సిద్ధం చేస్తూ ప్రోత్సహిస్తుంటారు. ఇక ఈసారి నిర్వహించిన స్పెల్లింగ్‌-బీ పోటీల్లో లూసియానాకు చెందిన 14 ఏళ్ల జైలా అవంత్‌ గార్డే విజేతగా నిలిచింది. దీంతో 93 ఏళ్ల ఈ కంటెస్ట్‌ చరిత్రలో ఈ ట్రోఫీ నెగ్గిన మొదటి ఆఫ్రికన్‌ అమెరికన్‌గా, రెండో నల్లజాతీయురాలిగా చరిత్ర సృష్టించిందీ యంగ్‌ గర్ల్‌.

కథ చెబుతాను... ఊ కొడతారా..!

రాత్రయిందంటే చాలు.. బామ్మ చెప్పే నీతికథలు వింటూ నిద్రలోకి జారుకోవడం మనందరికీ చిన్ననాటి ఓ మధుర జ్ఞాపకం! అప్పుడంటే చాలావరకు ఉమ్మడి కుటుంబాలు కాబట్టి ఇది వర్కవుట్‌ అయింది.. ఇప్పుడు వృత్తి ఉద్యోగాల రీత్యా చాలామంది ఇంట్లో పెద్దవాళ్లు, కన్న వాళ్ల నుంచి దూరంగా వచ్చేస్తున్నారు. దీంతో పిల్లలు వాళ్ల గ్రాండ్‌పేరెంట్స్‌ని, వాళ్లు చెప్పే బోలెడన్ని కథల్ని మిస్సవుతున్నారు. ఇలాంటి అనుభవమే తన చెల్లెలికీ ఎదురైందంటోంది 18 ఏళ్ల ప్రియల్ జైన్‌. అది చూసి ఆలోచనలో పడిపోయిన ఆమె.. నీతి కథలు చెప్పే ఓ ప్లాట్‌ఫామ్‌కు శ్రీకారం చుట్టింది. చిన్నారులకు బామ్మ దగ్గర లేని లోటుని తన వెబ్‌సైట్ తీరుస్తుందంటోన్న ఈ యంగ్‌ ఆంత్రప్రెన్యూర్‌ కథేంటో మనమూ తెలుసుకుందాం రండి..

చిన్నప్పటి కల.. ఇలా సాధించేసింది!

ఆడవారు అనుకుంటే ఏదైనా సాధిస్తారు... వారికి కావల్సిందల్లా కాసింత ప్రోత్సాహం. ఎవరి సహకారం ఉన్నా, లేకున్నా తల్లిదండ్రులు, తోడబుట్టిన వారి సహకారం మాత్రం ఉంటే చాలు... అమ్మాయిలకు అసలు తిరుగుండదు. అన్నింటా విజయాలే సాధిస్తారు. పలువురికి ఆదర్శంగా నిలుస్తారు. అందుకు తాజా ఉదాహరణే 24 ఏళ్ల మావ్యా సూదన్‌. జమ్మూకశ్మీర్‌లోని ఓ మారుమూల గ్రామానికి చెందిన ఈ యువతి ఇటీవల ఇండియన్‌ ఎయిర్‌ ఫోర్స్‌ ఫైటర్‌ పైలట్‌గా నియమితురాలైంది. ఈ నేపథ్యంలో దేశం మొత్తంమీద ఈ అవకాశం దక్కించుకున్న 12 వ మహిళగా, మొదటి కశ్మీరీ మహిళగా గుర్తింపు పొందిందీ యంగ్‌ సెన్సేషన్.

ఆరోగ్యమస్తు

మరిన్ని

అనుబంధం

మరిన్ని

'స్వీట్' హోం

మరిన్ని

వర్క్ & లైఫ్

మరిన్ని

సూపర్ విమెన్

మరిన్ని

బ్యూటీ & ఫ్యాషన్

మరిన్ని